/img/tv1.svg
RU KZ
Яндекс.Такси Петропавл мен Қостанайға келді

Яндекс.Такси Петропавл мен Қостанайға келді

Енді такси Қазақстанның 13 қаласында жұмыс істейді. 

13:35 16 Қараша 2017 4717

Яндекс.Такси Петропавл мен Қостанайға келді

Автор:

Жанболат Мамышев

Петропавл және Қостанай қалаларында Яндекс.Такси сервисі жұмысын бастады. Енді қала тұрғындары таксиге мобильді қосымша немесе сайт арқылы тапсырыс бере алады. Қазір бұл такси Астана, Алматы, Ақтөбе, Атырау, Қарағанды, Қызылорда, Павлодар, Орал, Өскемен, Семей және Шымкент қалаларында қызмет етеді.

Машинаға тапсырыс беру үшін диспетчерге қоңырау шалу қажет емес. Яндекс.Такси пайдаланушының орналасқан жерін автоматты түрде анықтап, тапсырысты бәрінен бұрын келуі мүмкін жүргізушіге жібереді. Петропавлда және Қостанайда таксиді күту уақыты орта есеппен 5 минут, ал автокөліктің қозғалысын қосымшадағы қаланың картасынан бақылап отыруға болады.

Бұл қалаларда бірыңғай тариф қолданылады: сапардың құны 200 теңгеден аспайды, бұл сомаға машинаны беру және 2 шақырым жол кіреді, одан ары әрбір шақырым үшін ең көбі 50 теңгеден есептеледі. Мысалы, Петропавлда 380 теңгеге неке сарайынан «Азия» сауда үйіне дейін жетуге болады. Ал Қостанайда ОӘД-нен  «Жемчужина» медициналық орталығына дейінгі сапардың құны шамамен 210 теңгеге тең болады. Қала сыртына шыққанда бағдардың әрбір шақырымы үшін 100 теңгеден артық сома есептелмейді.

«Біздің технологияларымыз бен алгоритмдеріміз таксиді ыңғайлы және қолжетімді көлік түріне айналдырды. Тапсырысты автоматты түрде тапсырыс берушіге жақын маңда жүрген жүргізушіге беру арқылы біз қызметтің өзіндік құнын қысқартамыз, себебі жүргізуші клиентке бүкіл қаланы айналып бармайды. Қазіргі уақытта Солтүстік Қазақстандағы біздің қызмет ең қолжетімді болып тұр», – дейді Яндекс.Такси халықаралық даму қызметінің басшысы Мушег Саакян.

Таксиге тапсырыс бергенде баратын жердің нақты мекенжайын білу міндетті емес, мекеменің немесе ұйымның атауын көрсету жеткілікті. Сервис оны картадан тауып, маршрут құрады. Бұған қоса машина беру үшін анағұрлым қолайлы орын ұсынады. Мысалы, кейбір жағдайларда жолдың екінші бетіне өту жеткілікті, сонда машина тезірек келеді, ал сапардың құны төмендеу болады.

Яндекс.Такси таксопарктермен және диспетчер қызметтерімен жұмыс істейді, жүргізушілермен тікелей байланысқа шықпайды. Тапсырыстарды үлестіру барысында қосымша пайдаланушылардың бағалауларына және орындалған сапарлардың статистикасына негізделген жүргізушінің рейтингін есепке алады. Петропавл және Қостанай қалаларында сервиске төрт серіктес таксопарктен 200 автокөлік қосылған.

Яндекс.Такси тегін қосымшасы iOS және Android үшін қолжетімді, сапардың құнын cайтта есептеуге болады.

Яндекс.Такси сервисі Қазақстанда, Ресейде, Қырғызстанда, Беларусьте, Арменияда, Молдовада және Грузияда жұмыс істейді. Жалпы сервиске 280 мыңнан астам жүргізуші қосылған.

Гүлназ Ермағанбетова, Жанболат Мамышев

Қазақстан татарларға ең арзан несие ұсынады

10 Тамыз 2020 12:13 5226

«KamLitKZ» компаниясы артында кімдер тұр?

Биылғы ақпан айында Индустрия және инфрақұрылымдық даму министрлігі елімізде Ресей 2 жаңа жобасын іске қосатынын, олардың жалпы құны 106 миллиард теңге болатынын хабарлаған-тын. Бұл – жүк көліктерінің жетекші білігінің басты берілісін (главная передача ведущих мостов) және шойын құймаларын өндіретін зауыттар болуға тиіс еді.

«Қос жобада 1,5 мың жұмыс орны ашылады. Дайын өнімнің 95%-ы шетелге экспортталады: Ресейдегі «КамАЗ»-дың басты конвейеріне жеткізіледі. Осылайша, аталған кәсіпорындар жеткізушілердің жаһандық технологиялық тізбегіне кірігеді», – деп дәріптеді министрлік.

Енді Татарстанның әзірше бұл жобаларды келесі жылға ысырғаны мәлім болды. Ал олар мүлдем бас тартпау үшін ынталандыру керек.

Сауда және интеграция министрлігі «Экспорттық қаржыландыруды ынталандыру үшін «Қазақстанның даму банкі» АҚ-ына кредит бере отырып, «Бәйтерек» ұлттық басқарушы холдингі» АҚ-ына бюджеттік кредит берудің негізгі шарттарын бекіту туралы» деген адам жаңылысар атауы бар Үкімет қаулысының жобасын әзірлеп отыр.

Қарапайым тілмен айтсақ, тізбек келесідей: Үкімет алдымен бюджеттен Сауда және интеграция министрлігіне 30 миллиард теңге несие ұсынады, ведомство оны ары қарай «Бәйтерекке» ұзатады, ол оны өзінің «Қазақстан даму банкіне» береді, одан кейін осы мемлекеттік банк ақшаны өзінің «БРК-Лизинг» еншілес кәсіпорнына ұстатуға тиіс. Ары қарай ел қаржысы ресейлік-татарлық инвесторға жол тартады.

Қыруар қаржы не үшін қажет болды?

Сауда және интеграция министрі Бақыт Сұлтановтың түсіндіруінше, Үкіметтің осы қаулы жобасы экспортқа бағдарланған кәсіпорынды 2020 жылы 30 миллиард теңгеге қаржыландыруды көздейді. Нәтижесінде Қазақстан шетелге сататын шойын құймасының көлемі 2030 жылы 29,9 млрд теңгеге жетпек. Зауыт Қостанайда бой көтереді деп күтілуде.

«Кәсіпорын шығаруға тиіс құрамдас бөліктердің негізгі сатып алушысы – Ресейдің жүк автомобильдерінің ірі өндірушісі. Сондықтан жоба экспортқа бағдарланған саналады. «КамАЗ» ЖАҚ өндірістік желілерін жүк көліктерінің блоктарымен, жетекші білік картерінің арқалығымен толық қамтамасыз ету жоспарлануда. Еуропалық инжиниринг компаниясын тарта отырып, «үлкен жетілік» елдерінің компанияларына құрамдас бөліктерді өткізудің бизнес-мүмкіндіктері қарастырылады. Жобаны іске асыру нәтижесінде 297 жаңа тұрақты жұмыс орны құрылады. 2020–2023 жылдар аралығында құрылыс-монтаж жұмыстары кезеңінде құрылыс саласында 200-ден астам уақытша жұмыс орны ашылады», – деді министр Бақыт Сұлтанов түсіндірме жазбада.

Сонымен, инвестордың шойын құймасы өндірісін құруы үшін құрал-жабдықтар сатып алуын лизингтік қаржыландыруға 30 миллиард теңге бюджет заемы 20 жыл мерзімге жылдық 0,2% ставкасымен беріледі. Пайыз деген аты ғана, себебі Қазақстанда жыл сайынғы инфляция 5–7%. Яғни, қарыз алушы пайдаға шығады, ал бюджет шығын шегеді.

Бұл жерде ел қаржысын бөліп төлеп, сақтық таныту деген болмайды: құжатта бүкіл сома қарыз алушының шотына бір мезгілде аударылатыны жазылған. Кредит бойынша негізгі қарызды өтеуге борышкер тек 2026 жылы кіріседі. Оған дейін 6 жыл жеңілдікті кезең беріледі.

Осы жоба бойынша Қазақстанның технологиялық серіктесі – Татарстанның Яр Чаллы (орысша Набережные Челны) қаласындағы «КамАЗ» жария акционерлік қоғамы болмақ.

«Бәйтерек» жобаға делдалдықтан қанша табады?

Негізі, кәсіпорын шығыны 30 миллиардпен шектелмейді, әлдеқайда көп. Сауда және интеграция министрлігі әзірлеген «Қаржы-экономикалық негіздемеде» (ҚЭН) жаңа кәсіпорынға барлығы 58 миллиард 286 млн теңге бюджеттік арзан кредит беру көзделіп отырғаны айтылады.

«Қазіргі әлемдік жағдайға байланысты Қостанай қаласында зауытты салу жобасын іске асыру 2021 жылға ауыстырылды. Осыған байланысты ҚЭН сомасы қысқартылды», – деп хабарлады министрлік.

Демек, қалған сома кейін қосымша бөлінуі керек.

Биылғы жыл басында билік «Қостанайда жүк автокөліктеріне арналған шойын құймаларының өндірісі 2022 жылы құрылады» деп нақты айтқан. Енді ондай нық сенім жоқ сияқты. ҚЭН-інде: «Егер құрылысы салынса (орысша нұсқасы: в случае строительства), жобаны жүзеге асыру мерзімі 2020–2040 жылдар» деп көрсетілген.

«Жоспарланып отырған зауытта құйма бұйымдар, яғни қозғалтқыштарға арналған цилиндрлердің блоктары және оның бастары, сондай-ақ жүк автомобилдеріне арналған жетекші білік картерінің тұтас құйылған арқалықтарының өндірісі жолға қойылады деп болжануда», – дейді ведомство.

Егер татарлар бас тартпаса, әрі бюджеттік миллиардтаған қаражат босқа талан-тараж етілмей, нысаналы жұмсалып, жаңа технологиялы зауыт шынымен пайда болса, онда оның тауарларының негізгі сатып алушысы – татардың «КамАЗ» ЖАҚ-ы болмақ. Ол 40 мың тоннаға дейінгі көлемде әлгі ірі габаритті құйма бөлшектерді сатып алуға ниет танытып отыр. Жеткізуші мен сатып алушының осыған қатысты міндеттемесі оффтейк контрактімен бекітілетін болады. Сонда жыл сайын қостанайлық жаңа зауыт шамамен 28 миллиард теңге тұрақты табыс тауып отырмақ.

«Зауыттың өндіріс цехының жалпы ауданы шамамен 25 мың шаршы метрді, ал құрылыс алаңы 31,8 гектарды құрайды. Құрылыс жұмыстарын 2021 жылдың екінші жартыжылдығында аяқтау шамаланып отыр. Жабдықты монтаждау шамамен 2021 жылдың 4 тоқсанында басталады. Зауытты толығымен пайдалануға беру 2023 жылдың бірінші тоқсанына жоспарлануда», – деп хабарлады министрлік.

Қостанайда кәсіпорнын ашатын «KamLitKZ» ЖШС-ының қожайындары да анықталды. Оның 44,1%-ы – Татарстанның «КамАЗ» ЖАҚ-ына, 20,9%-ы – Австрияның PowerLine Handels GmbH компаниясына, 20%-ы – KIDF (Премьер А.Мамин төрағалық ететін, АХҚО құрамындағы Kazakhstan Investment Development Fund қорына), 10%-ы – «ҚазБелАгроЛизинг» компаниясы, 5%-ы – «Тобыл» әлеуметтік-кәсіпкерлік корпорациясына тиесілі.

Айтқандай, бюджеттік 58 миллиард теңге қаржыдан жолай делдалдар, «Бәйтерек» холдингінің топ-менеджерлері біраз пайдаға кенелмек: «Холдинг маржасы жыл сайын 0,05%-ды құрайды». Бұған «Бәйтеректің» кредиттерді әкімшілендіру бойынша шығыстары және салығы кіріп отыр.

Жанат Ардақ


Telegram каналымызға жазылыңыз! 

Қостанай облысында халық пен билік уақытқа таласуда

03 Наурыз 2020 10:45 1924

Бастамашыл топ Президентке шағымданған.

Ал жергілікті билік өкілдері Үкіметтен кеңес сұрап отыр. Мәселенің мәнісін түсіндіре кетсек, қазіргі кезде Қазақстанда 2 сағат белдеуі ғана бар. Дегенмен, шынында қазақтың ұлан-байтақ жері 4 географиялық сағат белдеуінде орналасқан: UTC+3, UTC+4, UTC+5, UTC+6.

1924 жылдан бері мемлекетіміз осы ғылыми тұжырымдаманы ұстанды. Алайда Үкіметтің 2004 жылғы 20 маусымдағы қаулысымен еліміз 2 сағаттық белдеуге ауысты. Осы мақсатта 2004 жылғы 31 қазанда Қостанай, Қызылорда, Орал, Атырау және Ақтау жазғы уақытқа көшпей қалды. Нәтижесінде, Қостанай UTC+06 уақытына көшті.

Өңірдің өз сағат белдеуінде болмауы жасөспірімдер және ересектер арасындағы суицидке, жас ұрпақтың әлжуаздануына, жүрек-қан тамыры дерттерінің дендеуіне, психикалық-эмоционалды жүктемеге, сүйек патологияларына және басқасына соқтыратын көрінеді. Елордалық екі ғылыми-зерттеу мекемесінің – Айтхожин атындағы Молекулярлық биология және биохимия институты мен Адам және жануарлар физиологиясы институты «қос белдеудің» адам денсаулығына және әлеуметтік өміріне теріс ықпалын растаған. Бұл зерттеу осының алдында Қызылорда өңірінің сұрауы бойынша жүргізілді.  

Енді Қостанай өңірінің жұртшылығы Мемлекет басшысынан бұрынғы уақытқа қайта оралуды сұрап жатыр.

«Құрметті Президент! Үкіметке Қостанай облысын өз сағаттық белдеуіне қайтару туралы тапсырма беруіңізді сұраймыз! Психикалық-эмоционалды көңіл-күйі жақсы, дені сау адамдар – гүлденген мемлекеттің тірегі, табысты экономиканың кепілі. Қостанайлықтар әрқашан адал әрі көп еңбек етіп, өз Президентін барлық бастамада әрдайым қолдап келеді», – делінген 3 мың адам қол қойған хатта. 

Бұл мәселе өткен жылы жергілікті өкілетті органда қаралған. Оған шақырылған медицина мамандары уақыт ауысуынан еш зиян жоқтығын, халықтың үйреніп қалғанын айтыпты. Сонымен тынғандай болды. Бірақ бұл мәлімдеме жергілікті жұртшылықты тіптен ашындырды. Мәселе алда мәслихаттар қарауына қайта шығарылмақ. Осыған орай Лисаковск қаласында идеяны белсенді ілгерілетуші бастамашыл топ құрылды. Олар сағат тілін ең болмаса, 1 сағатқа кері жылжытуды талап етеді.

Жергілікті өзін-өзі басқару органдары қолданыстағы сағат белдеуінің зиянды-зиянсыздығын кең ауқымды тексеруге қаржы таппай отыр. Лисаковск қалалық мәслихатының хатшысы Салтанат Шалдыбаева бастамашыл топтың облысты географиялық табиғи уақытына кері көшіру ұсынысын қарау кезінде проблемаға жолыққандарына назар аудартты.

«Біздің қолымызда тіпті институттардың әлеуметтік зерттеу қорытындылары да жоқ. Оң немесе теріс шешім қабылдауда неге сүйенерімізді білмейміз. Бастамашыл топқа «Қостанай облысының сағаттық белдеуі шекарасын өзгерту бойынша дәлелдеріңіз орынды не орынсыз» деп қалай айтамыз? Бұл мәселені 2019 жылдың сәуірінде Қостанай өңірінің тұрғындары да көтерген. Мәслихаттың тұрақты комиссияларының отырыстары қорытындысында жергілікті депутаттардың басым бөлігі бастамаға қарсы дауыс берді. Алайда бастамашыл топ қабылданған шешіммен келіспей, биыл қайта ұсынып отыр», – дейді Салтанат Шалдыбаева.

Бұл ретте ақпарат құралдары өз беттерінше, сондай-ақ мәслихат депутаттары өз округтерінде халық арасында сауалнама мен анкеталық зерттеу жүргізіпті. Екеуі де қостанайлықтардың кезінде уақыттың өзгеріп кеткенін әлі күнге құптамайтынын көрсетті.

Себебі, сағат тілінің табиғи уақытқа сәйкеспеуі салдарынан ересек адамдар дел-сал күй кешеді, артериалды қысым артқан, ұйқысыздық көбейген. Балалар жағы қазіргі оқу режиміне біраз бейімделіп алған екен. Әрине, оларға мектепке бару үшін түн қараңғысында тұруға тура келеді. Сонымен бірге екінші ауысымдағы шәкірттер үйлеріне бұрынғыдай тас қараңғыда емес, ашық-жарықта орала алады.   

«Біз әлеуметтік зерттеу жүргізуді сұрап, Маркетингтік және әлеуметтік зерттеулер институтына жүгіндік. Алайда олар өз қызметі үшін сұрап отырған ақы – шамамен 4 миллион теңге біздің 45 мың ғана тұрғыны бар моноқала үшін тым көп», – дейді Салтанат Қазымбекқызы.

Сондықтан олар Үкіметтен өз құрылымдары көмегімен тиісті зерттеу жүргізіп, нақты әрі білікті түсініктеме беруді сұрайды.

Әйет ауылының тұрғыны Ольга Ведлер халық талабына көнбей қыңырланған биліктің тірлігіне қапаланады.

«Жағрафия – нақты ғылым. Біздің өңір қандай уақыт белдеуіне жатады екен, солай болуы керек. Әйтпесе, жердің айналу жылдамдығын өзгертсін! Бізді жазғы уақытқа көшіріп, сонда 15 жылға қалдырып қойды. Бұл – халыққа қарсы қылмыс деп санаймын. Қазақстанның өзге өңірлері күнмен бірге күлімдеп оянып жатады. Бізде сағат тілі бойынша түскі уақытымыз таңертеңге сәйкес келеді. Не деген масқара! Сыртта жарық болғасын, ойын баласын түнде жатқыза алмайсың, таңертең зорға оянады. Ересектер де үлкен стресте», – дейді ол.

БҒМ Адам және жануарлар физиологиясы ғылыми зерттеу институтының байламынша, сағат тілінің тиісті уақыт белдеуіне көшуі физиологиялық ауытқуларды жоюға, сонымен бірге өңірде электр қуатын 4,2% үнемдеуге мүмкіндік береді.   

«Қостанай облысы аумағында биологиялық және әлеуметтік уақыттың өзара сәйкеспейтіні байқалуда. Бүгінде онда географиялық және әкімшілік сағат белдеулері арасындағы айырмашылық 2 сағатты құрайды. Демек, географиялық тұрғыдан қарастырсақ, Қостанай өңірінде сағат тілін ауыстыру орынды», – дейді Білім және ғылым министрлігінің География институтының директоры, профессор Ахметқал Медеу.

Әзірге Қостанай Нұр-Сұлтанның сағатына сай жатып, тұрады. Елорданың бұл істе өңірге тәуелсіздік берер-бермесі биыл анықталуы ықтимал.

Жанат Ардақ