Жеңіл өнеркәсіп, жиһаз және тамақ өнеркәсібі сондай-ақ құрылыс материалдары салаларындағы қарапайым заттар экономикасы соңғы 3 айда 2%-дан 20%-ға өсті. Үкімет отырысында "Атамекен" ұлттық кәсіпкерлер палатасы басқарма төрағасы осылай деді.
"Жеңіл өнеркәсіпте оң өзгеріс байқалады. Десек те еліміздің 5 облысында мемлекеттік сатып алу жоспары тек 50%-ға ғана орындалды. Бұл жердегі жергілікті қамту үлесінің 36%-ы отандық кәсіпорындардың еншісінде. Біз жоспарлау мәселесін реттеуді сұраймыз. Мысалы, қазір Қызылорда облысы 46% көрсеткішпен алда келе жатыр. Бірақ жоспардың 22%-ы ғана орындалған. Жылдың аяқталуына санаулы айлар қалды. Жоспардың қалған бөлігі қашан орындалатыны белгісіз", – деді Абылай Мырзахметов.
Басқарма төрағасының сөзінше, Батыс Қазақстан облысы мемлекеттік сатып алу жоспарының 89%-ын жүзеге асырған. Алайда жергілікті қамту үлесін, яғни отандық кәсіпорындарды қолдау саясаты 1%-ды ғана құраған.
"Отандық кәсіпорындарды қолдауды қатаң бақылауды сұраймыз", – деді Абылай Мырзахметов.
Оның айтуынша, жиһаз өнеркәсібі саласында Павлодар, Қызылорда, Түркістан, Қостанай, Маңғыстау облыстарында жоспар 50%-дан жоғары орындалған. Отандық кәсіпорындарды қолдау шаралары 40%-ды құраған.
"Алматы, Ақмола, Ақтөбе, Қарағанды, Шығыс Қазақстан облыстары және Нұр-Сұлтан, Алматы қалаларында жоспар 53%-ға орындалған. Отандық кәсіпорындардың өнімін сатып алу көрсеткіші 6% шамасында болған. Батыс Қазақстан облысы жоспарды 83%-ға орындаған, бірақ жергілікті қамту үлесі 3% ғана болған", – деді Абылай Мырзахметов.
Басқарма төрағасының баяндауынша, тамақ өнеркәсібі саласында Павлодар, Түркістан, Қызылорда, Жамбыл облыстары мен Алматы қаласы жоспарды 70%-ға орындаған. Осылайша отандық кәсіпорындардан сатып алу көрсеткішін 40%-ға жеткізген. Ақмола, Маңғыстау, Алматы, Шығыс Қазақстан, Солтүстік Қазақстан, Қостанай облыстары мен Нұр-Сұлтан қаласы жоспарды 64%-ға орындаған. Бірақ отандық кәсіпорындардан өнім сатып алу көрсеткішін 7%-дан асыра алмаған.
"Батыс Қазақстан облысында жоспардың 38%-ы жүзеге асырылған. Алайда отандық кәсіпорындардан өнім алу көрсеткіші нөл пайыз болған", – деді Абылай Мырзахметов.
Белгілі болғандай, құрылыс материалдары бойынша Павлодар, Алматы, Түркістан және Шығыс Қазақстан облыстары жоспардың 67%-ын орындап, жергілікті қамту үлесінің көрсеткішін 38%-ға жеткізген. Жамбыл, Қостанай, Ақтөбе, Қызылорда, Солтүстік Қазақстан облыстары мен Нұр-Сұлтан, Шымкент қалалары жоспардың 53%-ын жүзеге асырғанмен, отандық кәсіпорындардан тауар алу көрсеткішін 8% ғана орындаған.
"Батыс Қазақстан облысында жоспар 86%-ды құраған, ал отандық кәсіпорындардан сатып алу көрсеткіші 2% болған", – деді Абылай Мырзахметов.
Белгілі болғандай, құрылыс-монтаж жұмысын атқаруға 900 млрд шамасында қаржы қарастырылған. Көрсетілген қаражаттың жартысы құрылыс материалдарын сатып алуға жұмсалуы тиіс. Алайда қазіргі көрсеткіш 31%-ды ғана құрап отыр.
Қанат Махамбет
