/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 383,45 Brent 36,55
Қуаңшылыққа тап болған диқандарға биыл қандай көмек бар?

Қуаңшылыққа тап болған диқандарға биыл қандай көмек бар?

Сақтандырудың жаңа тәртібі жарияланды. 

06 Маусым 2020 13:48 250

Қуаңшылыққа тап болған диқандарға биыл қандай көмек бар?

Ауыл шаруашылығын қаржылай қолдау қоры сақтандырудың жаңа шарты бойынша көрсетілетін қызметтердің тізімін сайтына жариялады. 

Жаңа шарт бойынша, егісті сақтандыру үшін бұрынғыдай қажет соманың 100 пайызын емес, тең жартысын төлесе жетіп жатыр. Яғни, бұрын бір гектар алқапқа 1440 теңге төлеп келсе, енді бір гектарға 722 теңге алынады. Алайда диқанның сол бір гектерға салған инвестициясы 30 000 теңге көлемінде болуы керек. Төлемдер сақтандыру сомасының 48%-іне дейін жетуі мүмкін. Бұл әр гектарға 14 400 теңге деген сөз. 

«Біз көптеген аймақтарда ылғал тапшылығын байқап отырмыз. Ұсынылып отырған жеңілдік осындай тәуекелді шақта фермерлер үшін жақсы мүмкіндік. Ерікті сақтандыру салада алғаш рет енгізіліп отыр. Сақтандыру «онлайн» режимде жүезеге аса береді. Комиссия мен агенттердің қатысуын талап етпейді. Мұның бәрі ақпараттық жүйелердің көмегімен, спутник арқылы қашықтан зондтауды қолдана отырып түзетілген. Ол жұмысты нидерландық мамандар істеп жатыр. Ал швейцариялық қайта сақтандыру компаниясы төлемдерге кепілдік береді. Бұл әлемдік ауылшаруашылық сақтандыру нарығында қол жетімді ең озық технологиялар. Енді оны қазақстандық фермерлер де пайдалана алады», - дейді Қазақстанның ауылшаруашылық сақтандыру қауымдастығының басшысы Елдос Әуезбеков.

Сонымен егістікті жаңаша сақтандыру қалай жүзеге асады?  Әуелі фермер Qoldau.kz порталына кіріп, «Agroinsurance» бөліміне өтуі керек. Онда өзіне қолайлы сақтандыру өнімін таңдайды. Әрі қарай өзі сенімді деп тапқан сақтандыру компаниясы таңдалады. Екіжақты келісімшартты электронды цифрлық қолтаңба арқылы жасап, шарт бойынша қызмет ақысын төлейді. Осыдан кейін, спутниктік суреттер негізінде жасалған топырақ пен өсімдіктердегі ылғал қоры туралы мәліметтер беріледі. Егер диқан құрғақшылықтан зардап шеккен болса, жеке парақшасына автоматты түрде хабарлама келеді. Әрі қарайғы процесте де комиссия шақырып, егіс алқабына барып, дақылдың зая болғанын дәлелдеудің қажеті жоқ. Осы істің бәрін қалай жүзеге асыру қажеттігін төмендегі сілтемеге кіріп, көруге болады.

Есжан Ботақара

АӨК саласын сақтандырудың жаңа жүйесі пайда болды

Сақтандыру операторы –  «ҚазАгро» холдингінің еншілес ұйымы - Ауыл шаруашылығын қаржылай қолдау қоры. 

08 Маусым 2020 12:02 284

АӨК саласын сақтандырудың жаңа жүйесі пайда болды

Ауыл шаруашылығын қаржылай қолдау қоры Қазақстанда ауылшаруашылық сақтандырудың жаңа жүйесі күшіне енген мәлім етті.       

Сақтандыру операторы –  «ҚазАгро» холдингінің еншілес ұйымы - Ауыл шаруашылығын қаржылай қолдау қоры.

Сақтандырудың жаңа түрінің  2004 жылдан бастап қолданыста болған өсімдік шаруашылығындағы міндетті сақтандыру түрінен айырмашылығы  – ерікті сақтандыру.

Сондай-ақ сала бойынша шектеу жоқ. Аграрлық сектордың кез келген  саласын сақтандыруға болады.    

«Мемлекеттік қолдау сақтандыру сыйақыларын субсидиялау түрінде көрсетіледі. Ол ауылшаруашылық тауар өндірушілерін ынталандыруға және сақтандыру келісімшартының құнын екі есеге азайтуға бағытталған: сақтандыру сыйақысының 50% -ы мемлекет тарапынан субсидияланады, ол үшін биыл республикалық бюджеттен шамамен 2,5 млрд теңге бөлінді», деп көрсетілген хабарламада.    

Сондай-ақ  жаңа жүйені әзірлеу кезінде өсімдік шаруашылығындағы міндетті сақтандырудың проблемалық мәселелерін ескерілген.

«Ауылшаруашылық тауар өндірушілерінің мүдделерін қорғау үшін Қазақстан Республикасының Қаржы нарығын реттеу және дамыту агенттігі лицензиялаған сақтандыру компаниялары ғана жұмыс істей алады», – деді «Ауыл шаруашылығын қаржылай қолдау қоры» АҚ басқарушы директоры Асқар Қалиев.      

Жүйеге әлемдік сақтандыру нарығында «А» рейтингі бар үш халықаралық қайта сақтандыру компаниясы кіреді. Олар отандық компаниялар қабылдаған тәуекелдерді қайта сақтандырады. Бұл сақтандыру тәуекелі туындаған жағдайда кепілдендірілген төлемдерді қамтамасыз етеді.

Келісімшарт жасалғаннан бастап төлемдерді бергенге дейінгі барлық рәсім Qoldau.kz электрондық платформасында ауылшаруашылық тауар өндірушісінің электрондық цифрлық қолтаңбасы негізінде жүзеге асырылады.

Сондай-ақ сақтандыру жүйесі агроөнеркәсіптік кешен дамыған сайын сақтандыру өнімдерінің тізімі нарықтағы қажеттілік пен сұранысты ескере отырып кеңейетін болады.

«Ауыл шаруашылығын қаржылай қолдау қоры» АҚ агроөнеркәсіптік кешеннің басым секторларындағы шағын бизнеске шағын несие берумен айналысады және «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы аясында несие беруші ретінде әрекет етеді.