Маңғыстау облысы бойынша Мемлекеттік кірістер департаменті жеке тұлғалардың шекарадан тауарлар өткізу кезінде олардың жеке пайдалануға арналған тауарлар болып есептелетінін және бұл жағдайда қандай шектеулер қолданылатынын түсіндіреді, деп жазады inbusiness.kz сайты.
Тауарлардың жеке пайдалануға арналған болып саналуы үшін келесі критерийлерге сай болуы керек:
Тауарлардың саны белгілі бір мөлшерден аспауы қажет:
Аң терісінен жасалған бұйымдар (оның ішінде бас киімдер) – бір адамға 1 (бір) зат.
Ұялы телефон, смартфон – бір адамға 2 (екі) бірлік.
Планшет – бір адамға 2 (екі) бірлік.
Портативті тасымалданатын компьютерлер және олардың керек-жарақтары (ноутбук, нэтбук) – бір адамға 1 (бір) бірлік.
Зергерлік бұйымдар – бір адамға 5 (бес) зат.
Велосипед – бір адамға 1 (бір) дана.
Бала арбасы – бір адамға 1 (бір) дана.
Тауарларды өткізу жиілігі – айына 1 реттен аспауы тиіс.
Көлік құралдарына қатысты ерекшеліктер:
Жеке пайдалануға арналған көлік құралдары, егер олардың саны жылына 1 (бір) бірліктен асса, кәсіпкерлік мақсатта пайдаланылатын деп есептеледі.
Құндық, салмақтық және сандық нормалар:
Әуе тасымалынан басқа, жаяу және ілеспе немесе ілеспе емес багажбен әкелінетін тауарлар үшін норма 500 еуро және 25 кг.
Халықаралық пошта немесе тасымалдаушы арқылы жеткізілетін тауарлар үшін норма 200 еуро және 31 кг.
Нормадан асып кеткен жағдайда төленетін алымдар:
Егер тауардың құны мен салмағы нормадан асып кетсе, құн нормасынан асып кеткен бөлігінен 30 пайыз, салмақ нормасынан асып кеткен бөлігінен 1 кг үшін 4 еуродан кем емес төленеді.
Ал халықаралық пошта жөнелтімдері мен тасымалдаушы арқылы жеткізілетін тауарлар үшін, құн нормасының асып кету бөлігінде 15 пайыз, ал салмақ нормасының асып кету бөлігінде 1 кг үшін кемінде 2 еуро төленеді.
Осылайша, жеке тұлғалардың жеке пайдалануға арналған тауарларды өткізу барысында арнайы талаптар мен шектеулерді сақтау маңызды.
