Артық ақшаны теңгемен жинап жатыр
Резиденттердің депозиттік ұйымдардағы депозиттерінің көлемі 2018 жылғы қазанның соңында өткен аймен салыстырғанда еш өзгермей, 17 641,4 млрд теңгені құрады. Соның ішінде заңды тұлғалардың депозиттері 9 317,9 млрд теңгеге дейін 0,4%-ға өссе, жеке тұлғалардың депозиттері 8 323,5 млрд теңгеге дейін 0,5%-ға қысқарды.
Ұлттық валютадағы депозиттердің көлемі бір айда 9 373,7 млрд теңгеге дейін 1,2%-ға өсіп, ал шетел валютасында 8 267,7 млрд теңгеге дейін 1,5%-ға азайды. Долларлану деңгейі 2018 жылғы қазанның соңында 46,9%-ды құрады.
Заңды тұлғалардың ұлттық валютадағы депозиттері 2018 жылғы қазанда 5 129,8 млрд теңгеге дейін 1,6%-ға ұлғайды, шетел валютасында 4 188,1 млрд теңгеге дейін 1,1%-ға азайды.
Жеке тұлғалардың теңгедегі депозиттері 4 243,9 млрд теңгеге дейін 0,9%-ға дейін ұлғайды, шетел валютасында 4 079,6 млрд теңгеге дейін 1,9%-ға азайды.
Мерзімді депозиттердің көлемі бір айда 1,9%-ға қысқарып, 12005,5 млрд теңгені құрады. Олардың құрылымындағы ұлттық валютадағы салымдар 6 170,8 млрд теңге, шетел валютасындағы қаржы 5 834,7 млрд теңгені құрады.
Банктік емес заңды тұлғалардың ұлттық валютамен мерзімді депозиттері бойынша орташа алынған сыйақы мөлшерлемесі 7,1%-ды, жеке тұлғалардың депозиттері бойынша 10,7%-ды құрады.
Бизнес доллармен, халық теңгемен несие алады
Банктердің экономиканы кредиттеу көлемі 2018 жылғы қазанның соңында 12 776,4 млрд теңгені құрап, өткен айдағыдан 0,9%-ға ұлғайып отыр.
Заңды тұлғаларға берілген кредит көлемі 7 595,7 млрд теңгеге дейін, 0,3%-ға, жеке тұлғалардікі 5 180,8 млрд теңгеге дейін, 1,7%-ға ұлғайды.
Қайта құрылымдауды бастан өткеріп жатқан және лицензиядан айырылған банктердің кредит портфелін есепке алмағанда, экономиканы кредиттеудің жылдық өсімі 8,3%-ды құрайды.
Ұлттық валютадағы кредиттің көлемі бір айда 9 845,9 млрд теңгеге дейін 0,9%-ға өсті. Олардың құрылымында заңды тұлғаларға берілген кредиттер өзгерген жоқ, ал жеке тұлғаларға берілген кредиттер 1,9%-ға артты.
Шетел валютасындағы кредиттің көлемі 2 930,5 млрд теңгеге дейін 0,6%-ға ұлғайды. Олардың құрылымында заңды тұлғаларға берілген кредиттер 0,9%-ға ұлғайса, ал жеке тұлғаларға берілген кредиттер 3,6%-ға азайды.
Теңгемен кредиттеудің үлес салмағы 2018 жылғы қазанның соңында 77,1%-ды құрады (2017 жылғы желтоқсанда – 73,7%).
Ұзақ мерзімді кредиттің көлемі бір айда 10 917,5 млрд тенгеге дейін, 0,8%-ға, ал қысқа мерзімді кредиттің көлемі 1 859 млрд теңгеге дейін, 1%-ға ұлғайды.
Шағын кәсіпкерлік субъектілерін кредиттеу 2 421,2 млрд теңгеге дейін 3,3%-ға азайды.
Салалар бойынша бөлінген банктердің экономикаға берген кредиттерінің ең қомақты сомасы өнеркәсіп (жалпы көлемдегі үлесі – 15%), сауда (13,6%), құрылыс (6,3%), ауыл шаруашылығы (3,9%) және көлік (4,6%) салаларына тиесілі.
Бауыржан Мұқан
