Облыстық энергетика және тұрғын үй шаруашылық басқармасының басшысы Дәурен Асқаровтың хабарлауынша, жылу көздері жоспарлы режимде жұмыс істеп жатыр. Бұдан бөлек қараша айында өңірдің жылу көздері мен жылу желілерінде 3 штаттан тыс жағдай тіркелді.
Атап айтқанда, 21 қараша күні Арқалық ЖЭО-да іске қосу-баптау жұмыстары кезінде №5 су жылыту қазандығында жарылыс болды. Салдарынан қазандықтың қаптамасы бұзылды. Облыс әкімдігі ЖЭО жұмысына бұл жағдай әсер етпегенін, апаттың салдары жойылғанын атап өтті.
27 қараша күні Меңдіқара ауданы Боровское ауылының орталық қазандығында негізгі қазандықтардың бірі істен шықты. Апат сол күні жойылды.
30 қарашада Рудныйда құбыр жарылды. Жергілікті әкімдік пен коммуналдық қызметтердің күшімен апат жойылды. Дәурен Асқаровтың айтуынша, ТЖ салдарынан тұтынушылар жылудан ажыратылмаған. Алайда тұрғындар пәтерлеріндегі суыққа шағымданған болатын. Рудный әкімдігі мұны желідегі қысымның төмендеуімен түсіндірді.
Аймақ басшысы Құмар Ақсақалов Рудныйда жылу желілерінің тозуы 62%-ды, Арқалықта 85%-ды құрайтынын атап өтті. Арқалықта ЖЭО осы уақытқа дейін толығымен көмірге көшпеген. Үш қазандықтың екеуі ғана көмірмен жұмыс істейді, олардың қоры жылдық қажеттіліктің 52%-ын құрайды. Бұл көмір қорының төмен үлесі бар аймақтағы жалғыз қала.
Штаттан тыс жағдайлар ретінде Федоров және Сарыкөл аудандарының мектептеріндегі суық кабинеттерді айтуға болады. Тұрғындар 20 қараша аяздың басталуымен сыныптардағы температура 15 градустан төмен болғанын айтқан.
Облыстық білім басқармасының басшысы Зәуре Байменованың айтуынша, Ы.Алтынсарин атындағы Федоров мектебіндегі мәселе қазандық пен көмірді газға ауыстыру бойынша жұмыстардың кеш аяқталуынан болған. Ол барлық кабинетте температура қалыпты екенін, алайда екі кабинетте әлі де суық екенін атап өтті.
Ал, Сарыкөл мектебіне күрделі жөндеу жұмыстарын жүргізу туралы айтылды. Жобалық-сметалық құжаттама дайын көрінеді. 300-ге жуық бала оқитын жалпы білім беретін мектеп ғимаратын жөндеуге 687 млн теңге қажет. Бүгінгі таңда балалар екі ауысымда білім алып жүр. Себебі екі кабинеттен басқа барлық кабинетте температура қалыпты.
"Біз жылу мәселесіне нақты әсер ету үшін тиісті құралдар мен қаражат қажет екенін түсінеміз. Жобалық-сметалық құжаттама уақытында әзірленуі тиіс. Өкінішке қарай, көп жағдайда онымен байланысты жұмыстар кешеуілдеп жатады. (...) Қаржыландырудың жеткіліксіздігі басқа аймақтардағы сияқты төтенше жағдайларға әкеп соқтырады. Бүгінгі таңда біз 2023 жылға арналған бюджетті қалыптастыру сатысында тұрмыз. Осы жобаларды қаржыландыруды қосымша қарастыруға дайынмын", - деп атап өтті Құмар Ақсақалов.
Аймақ басшысы 160 ауыл мектебінің ғимараттарынан қазандықтарды шығару жұмыстарын аяқтау қажеттігіне назар аударды. Оның айтуынша, жұмыс 2017 жылы басталып, 2021 жылы аяқталуға тиіс болған. Десек те, 100 мектепте ғана бұл жұмыс аяқталып, 17 мектепте қазандықтар жойылды. 2023 жылға арналған жоспар бойынша тағы 40 нысан бар.
