/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 442,30 Brent 36,55
Жапония Қазақстаннан жылқы етін сатып алады

Жапония Қазақстаннан жылқы етін сатып алады

АШМ Ветеринарлық бақылау және қадағалау комитеті өз өнімдерін экспорттауға дайын қазақстандық кәсіпорындардың тізімін жасады.

14 Шілде 2020 11:50 193

Жапония Қазақстаннан жылқы етін сатып алады

Ауыл шаруашылығы министрлігі қазақстандық жылқы мен жылқы етін экспорттау үшін Жапония нарығын ашты, деп хабарлады ведомствоның баспасөз қызметі.

Министрліктің айтуынша, бұл келісімге қол жеткізу үшін АШМ ұзақ уақыт жүйелі жұмыс жүргізген. Шетелдік әріптестерге алғашқы сұрау хат Ветеринариялық бақылау және қадағалау комитетінің атынан 2018 жылы жолданыпты. Онда қазақстандық фермерлер мен кәсіпкерлер Жапонияға жылқы етін жеткізуге мүдделі екені айтылған болатын.

«Ұзақ келіссөздердің нәтижесінде Жапония елінің Ауыл, орман және балық шаруашылығы министрлігі Қазақстан Республикасынан жылқыларды сою және қайта өңдеу кезінде алынған ет, ет шикізаты мен субөнімдерді Жапонияға экспорттауға ветеринарлық сертификат берді»,– дейді АШМ-нен.

2020 жылдың 25 мамырынан бастап экспорттың ашылуы туралы ресми хабарлама жіберілген. Осыдан соң Ветеринарлық бақылау және қадағалау комитеті өз өнімдерін экспорттауға дайын қазақстандық кәсіпорындардың тізімін жасап, дайындыққа кірісті.

«Ет одағы, «Атамекен» ҰКП және комитеттің облыстық аумақтық инспекциялары арқылы ауыл шаруашылығы тауарларын өндірушілерге жіберілген сұранымға 34 отандық кәсіпорын өздерінің келісімін берді. Олар туралы ақпарат жақында жапон тарапына берілді»,– деп хабарлады ведомстводан.

АШМ мәліметіне сүйенсек, Жапония бізден жылқының етін ғана емес, оны тірілей де алғысы бар.

Айта кетсек, осы уақытқа дейін Жапонияға жылқы етін негізгі экспорттаушы ел – Канада болып келді. Күншығыс елінде жылқы еті ежелден шикі түрде пайдаланылады және деликатес болып саналады. Жоғары дәмдік сапасы үшін қабырғадан алынған ет ерекше бағаланады. Жылқы етінен суши мен сашими ет кесектері дайындалады. 

Ақмола облысы еттің алғашқы партиясын Иранға экспорттады

«Астана Агропродукт» ЖШС Иран еліне эт экспорттау бойынша келісімшартқа қол қойып, алғашқы партиясын жеткізді.

13 Наурыз 2019 12:50 287

Ақмола облысы еттің алғашқы партиясын Иранға экспорттады

Ақмола облысы еттің алғашқы партиясын Иран Ислам Республикасына экспорттады, деп хабарлайды ҚазАқпарат.  

Қорғалжын ауданының Сабынды ауылындағы «Астана Агропродукт» ЖШС Қазақстанда бірінші болып Иран еліне эт экспорттау бойынша келісімшартқа қол қойып, алғашқы партиясын жеткізді.

«Қазақстаннан жеткен еттің алғашқы партиясы Иран еліне Ақмола облысынан жөнелтілді. Айта кету керек, Иран мұсылман мемлекеті болғандықтан, онда етке деген сұраныс жоғары. Бұл дегеніміз «Астана Агропродукт» ЖШС шығаратын еттің халал өнімдерінің жоғары стандартына сай екенін білдіреді», – деп атап өтті Ақмола облысы әкімінің орынбасары Марат Иғалиев.

Ақмола облысының кәсіпкерлік және өнеркәсіп басқармасының мәліметі бойынша, «Астана-Агропродукт» ЖШС ет комбинаты өңірдегі ет өнімдерін өңдейтін ірі кәсіпорын саналады.

«Кәсіпорын немістің инновациялық технологиясын қолданады. Кәсіпорын ет өнімдерін эспорттауға бағытталған, бәсекеге сай, жоғары сапалы «Бакара» брендімен ет және шұжық өнімдерін шығарады», – дейді басқармадағылар.

Елбасының Астана айналасында азық-түлік белдеуін дамыту туралы тапсырмасын жүзеге асыру шеңберінде «Бакара» ет комбинаты елорданың сауда орындарына ет өнімдерін ұсынып, астаналықтар тарапынан жоғары сұранысқа ие болып отыр.

«2014 жылдан бастап «Астана-Агропродукт» ЖШС Мәскеу супермаркеттеріне ет деликатестерін жеткізу бойынша  Ресей нарығына шықты. Ал, ҚР агроөнеркәсіп кешенін дамыту бойынша 2017-2021 жылдарға арналған мемлекеттік бағдарламаны жүзеге асыру арқылы отандық ауыл шаруашылығы тауарларын өндірушілер үшін жаңа нарықты игеруде. Өндірісті «халал» стандартымен сертификаттаған «Астана Агропродукт» ЖШС Қазақстанда бірінші болып Иран еліне ет өнімдерін жеткізу бойынша келісімшарт жасады», – деп толықтырды ведомстводан.

Келісімшарт төрт айға, яғни 700 тонна ет экспорттауға арналған. Қазіргі кезде алдын ала ақшасы алынып, 60 тонна ет жөнелтіліп отыр.

«Наурыз айының соңына дейін тағы жөнелтіледі. Ал, сәуір айынан бастап ай сайын 200 тоннадан ет экспортталады. Иран мұсылман елі болғандықтан, мал сою процесін осында арнайы келген молда бақылап отырады. Ет вакуумға салынып, салқындатылған күйде Иранға жөнелтіледі. Алғашқы партия ирандықтарға жеткізілді. Ет сапасы мен дәмі оларға қатты ұнады. Әріптестеріміздің ай сайынғы етке деген сұранысы – 1000 тонна. Сондықтан, алдағы уақытта экспорт көлемін арттыратын боламыз», – дейді «Бакара» компаниялар тобының құрылтайшысы Серік Рахымбаев.

Оның айтуынша, компания – Қытайға ет өнімдерін жеткізу бойынша аттестациялау шараларынан өтіп жатқан бес компанияның бірі.

Қазақстан 2019 жылы сиыр етінің экспортын 25 мың тоннаға жеткізбек

Өмірзақ Шөкеев президенттің қатысуымен өтіп жатқан үкіметтің кеңейтілген отырысында осындай жоспар қойылғанын мәлім етті.  

30 Қаңтар 2019 13:19 550

Қазақстан 2019 жылы сиыр етінің экспортын 25 мың тоннаға жеткізбек

«2017 жылы 5,5 мың тонна ет экспортталды. Ал былтырғы жылы осындай жиналыста 15 мың тоннаға дейін экспорттаймыз деген болатынмын. Былтырғы жылдың соңына қарай 19,9 мың тонна сиыр етін экспорттадық. Ал биылғы жылы 25 мың тонна экспорттаймыз деп міндет қойып отырмыз», – деді премьер-министрдің орынбасары, ауыл шаруашылығы министрі Өмірзақ Шөкеев сәрсенбі күні президенттің қатысуымен өткен кеңейтілген үкімет отырысында.   

Министрдің сөзін бөлген президент: «Ет туралы айтайық. Асыл тұқымды бұқаларды сатып алғанда қанша ет экспорттамақ болдық, 60 мың тонна?»,– деді.

«60 мың тонна деген әңгіме болды», – деп жауап берді Шөкеев.

Мемлекет басшысы бұрынғы ауыл шаруашылығы министрі Асылжан Мамытбековтен аталған көрсеткіштер неге орындалмағанын сұрады. Бұрынғы министр жоба бойынша жұмыс жүріп жатқанын, ет өндірісі өсіп жатқанын айтты.