Теңгеге сенім кете бастады
Резиденттердің депозиттік ұйымдардағы депозиттерінің көлемі 2018 жылғы қыркүйектің соңында өткен аймен салыстырғанда 0,2%-ға қысқарып, 17 648,1 млрд теңге болды.
Соның ішінде, заңды тұлғалардың депозиттері 9 284,5 млрд теңгеге дейін 1,4%-ға өсті, жеке тұлғалардың депозиттері 8 363,6 млрд теңгеге дейін 1,8%-ға қысқарды.
Ұлттық валютадағы депозиттердің көлемі бір айда 9 258,2 млрд теңгеге дейін 3,0%-ға қысқарды, шетел валютасында 8 389,9 млрд теңгеге дейін 3,1%-ға ұлғайды. Долларлану деңгейі қыркүйектің соңында 2017 жылғы желтоқсандағы 47,7%-бен салыстырғанда 47,5%-ды құрады.
Заңды тұлғалардың ұлттық валютадағы депозиттері 2018 жылғы қыркүйекте 5 051,5 млрд теңгеге дейін 3,1%-ға төмендеді, шетел валютасында 4 233,0 млрд теңгеге дейін 7,2%-ға өсті.
Жеке тұлғалардың теңгедегі депозиттері 4 206,7 млрд теңгеге дейін 2,8%-ға, шетел валютасында 4 156,9 млрд теңгеге дейін 0,8%-ға төмендеді.
Мерзімді депозиттердің көлемі бір айда 0,8%-ға азайып, 12 240,5 млрд теңгені құрады. Олардың құрылымындағы ұлттық валютадағы салым 6 202,5 млрд теңгені, шетел валютасымен 6 038,0 млрд теңгені құрады.
Банктік емес заңды тұлғалардың ұлттық валютамен мерзімді депозиттері бойынша орташа алынған сыйақы мөлшерлемесі 6,8% (2017 жылғы желтоқсанда – 8%), жеке тұлғалардың депозиттері бойынша – 10,8%-ды (11,7%) құрады.
Бизнестің банк ақшасына мұқтаждығы жоқ
Банктердің экономиканы кредиттеу көлемі 2018 жылғы қыркүйектің соңында өткен аймен салыстырғанда 2,7%-ға азайып, 12 667,5 млрд теңгені құрады.
Заңды тұлғалар кредиттердінің көлемі 7 571,5 млрд теңгеге дейін 5,3%-ға азайды, жеке тұлғалардікі 5 096,1 млрд теңгеге дейін 1,4%-ға ұлғайды.
Ұлттық валютамен берілген кредиттердің көлемі бір айда 9 753,8 млрд теңгеге дейін 1,4%-ға азайды. Олардың құрылымында заңды тұлғаларға берілген кредиттер 4,5%-ға азайды, жеке тұлғаларға берілген кредиттер 1,9%-ға ұлғайды.
Шетел валютасымен берілген кредиттердің көлемі 2 913,8 млрд теңгеге дейін 6,9%-ға, оның ішінде жеке тұлғаларға – 9,9%-ға, ал заңды тұлғаларға – 6,7 %-ға азайды. Теңгемен берілген кредиттердің үлес салмағы 2018 жылғы қыркүйектің соңында 77%-ды құрады.
Ұзақ мерзімді кредиттердің көлемі бір айда 10 827,7 млрд теңгеге дейін 3,4%-ға азайды, қысқа мерзімді кредиттердің көлемі 1 839,8 млрд теңгеге дейін 1,8%-ға ұлғайды.
Шағын кәсіпкерлік субъектілерін кредиттеу 2 504 млрд теңгеге дейін 13,2%-ға азайды.
Салалар бойынша бөлінген банктердің экономикаға кредиттерінің ең қомақты сомасы өнеркәсіп (жалпы көлемдегі үлесі – 15%), сауда (13,7%), құрылыс (6,3%), ауыл шаруашылығы (3,9%) және көлік (4,6%) сияқты салаларға тиесілі.
Бауыржан Мұқан
