/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 439,78 Brent 36,55
Мемлекеттік көмекті жалғастыру қажет – Эльдар Жұмағазиев

Мемлекеттік көмекті жалғастыру қажет – Эльдар Жұмағазиев

Биыл мемлекет тарапынан дайындаушы ұйымдарға қолдау көрсетудің мерзімі аяқталады.  

21:29 02 Тамыз 2020 495

Мемлекеттік көмекті жалғастыру қажет – Эльдар Жұмағазиев

Автор:

Нұржан Көшкін

Бүгінгі күні жөндеу немесе өңдеу үшін өнімдерді қабылдау, сұрыптау, сақтау тәрізді кәсіппен шұғылданатын дайындаушы ұйымдардың «алғашқы қосымша құн салығы (ҚҚС)» мәселесін шешу үшін мемлекет өз тарапынан қолдау көрсетіп жатыр. Яғни дайындаушы ұйымдардың төлейтін қосымша құн салығы субсидияланады.

Дегенмен «Атамекен» Ұлттық кәсіпкерлер палатасы басқарма төрағасының бірінші орынбасары – басқарма мүшесі Эльдар Жұмағазиевтің айтуынша, биыл осындай мемлекеттік көмек көрсетудің мерзімі аяқталады. Бұл тек дайындаушы ұйымдардың ғана емес, жеке қосалқы шаруашылықтар қызметіне де тікелей әсер етпек.

«Бұл бағдарламаны жүзеге асыру 2016 жылы басталды. Республикалық бюджет шығынының динамикасы 2016 жылы – 137,8 млн теңге, 2017 жылы – 474,3 млн теңге, 2018 жылы – 670,1 млн теңге, 2019 жылы – 809,6 млн теңге болса, 2020 жылға 1 млрд теңгеден астам қаражат қарастырылған», – деп нақты деректер келтіре отырып, Эльдар Жұмағазиев бүгінгі күні осы сала қолдауға мұқтаж екенін әлеуметтік желідегі парақшасында жазды.

Қазіргі таңда көкөніс, жеміс, тірі мал, ет тәрізді ауылшаруашылық өнімдерінің 27 түрін дайындау, сақтау, тасымалдау мен сатуды жүзеге асыру үшін ҚҚС субсидиялау заңмен мақұлданған.

«Дайындаушы ұйымдар кәсібіне инвестициялар салды, сүт қабылдау бекеттерін орнатты, өздерінің инфрақұрылымдық желісін құрды. Жаңа жұмыс орындары ашылды. Бұл өз кезегінде сүтті малды бағу, азықтандыру және сауу ережелерін сүт тапсырушыларға үйрету арқылы май құрамы, микробиологиялық көрсеткіштері және т.б. сипаттары бойынша сүт сапасын айтарлықтай жақсартуға мүмкіндік берді. Көптеген дайындаушылар оларға сүт сауу аппаратын тауарлық несие ретінде де беруде. Мәселен, Қарағанды облысындағы «Ауыл сүті» ЖШС 400-ден астам үй шаруашылығына сүт сауатын аппарат табыстады. Ал мал жинаумен айналысатын кәсіпорындар жайлы ерекше сөз қозғауға болады. Жамбыл облысындағы «Kaz Meat Kordai» ЖШС халықтан мал сатып алады да, оларды бордақылап, сиыр етін Алматы қаласына жеткізеді. Мұндай мысалдар өте көп», – дейді Ұлттық кәсіпкерлер палатасы өкілі.

Басқарма мүшесінің сөзінше, өткен жылдан бері «Атамекен» ҰКП дайындаушы ұйымдарға ҚҚС субсидиялау түріндегі мемлекеттік қолдаудың мерзімін созу жөнінде заңнамаға өзгерістер енгізу қажеттігін айтып, Ауыл шаруашылығы министрлігіне бірнеше рет хат жолдаған.

«Биылғы жылдың маусым айында осы мәселе бойынша Ауыл шаруашылығы министрлігі өкілдері және бизнестің қатысуымен жұмыс кеңесін өткіздік. Жеткізушілер мен сатып алушылар алдындағы міндеттерді орындау үшін және кәсіпті дамытуға айналым қаражатының жетпеуіне байланысты, барлық дайындау ұйымы мемлекеттік қолдауды сақтап қалу қажет екенін білдірді. Сонымен қатар, Мемлекет басшысы «Алқаптан сөреге дейін» пилоттық жобасының басталғандығын жариялағаны белгілі. Жобада дайындау ұйымдарының рөлі айырықша маңызға ие. Ашығын айтқанда, бұл бағдарламаны оларсыз жүзеге асыру мүмкін емес!», – деп баса айтты ол.

Эльдар Жұмағазиев сөз соңында Ауыл шаруашылығы министрлігі мен Үкіметті дайындаушы ұйымдарға көмек көрсету мерзімін созу жөніндегі заңнамаға енгізілетін өзгерістерді қолдауға шақырды.

Нұржан Көшкін

Бақылау бекеттерінде кептеліс болмайды

Жүк көліктеріне электронды рұқсат беріледі.

19 Сәуір 2020 12:31 1445

Бақылау бекеттерінде кептеліс болмайды

Фото: Серікжан Қобыланбаев

«Атамекен» ұлттық кәсіпкерлер палатасына карантин кезіндегі жүк тасымалына қойылған тосқауылдарға қатысты бизнес субъектілерінен 1 786 шағым түсті. 614 кәсіпкер жүк көлігі қозғалысының тәртібін түсіндіруді сұраса, 728 кәсіпкер жүк көлігінің бақылау бекеттеріне кіріп-шығуына рұқсат алуды жеңілдетуді өтінді. Ал 444 кәсіпкер «жасыл дәліз» арқылы емін-еркін қозғалуға рұқсат берілген жүк көліктері түрлі кедергілерге тап болып жатқанына шағымданды.

«Атамекен» ұлттық кәсіпкерлер палатасы басқарма төрағасының орынбасары Эльдар Жұмағазиевтің айтуынша, жергілікті жердегі төтенше жағдай жөніндегі штаб өкілдерінің жұмысындағы кемшілік жоғарыдағы мәселелердің туындауына түрткі болды. Жергілікті полицияның төтенше жағдай жөніндегі штабтың шешімі мен бас санитарлық дәрігердің қаулысын назарға алмай, жүк көліктерінің қозғалысын шектеуі мәселені ушықтырып жіберді.

Ұн өндірумен айналысатын «Белес Агро» ЖШС -ның жүк көліктері бақылау бекеттерінен өте алмай тұрып қалса, консервіленген ет өнімдерін шығаратын «Кублей» ЖШС-ның қала маңында тұратын қызметкерлері қалаға кіріп-шығудың машақатын көрген. «Шымкент құс» ЖШС жұмысшылары да осындай мәселелермен бетпе-бет келген.

Эльдар Жұмағазиевтің сөзінше, «Атамекен» мәселенің шешілуіне бастамашы болды. Өңірлік палата өкілдері дабыл қағып, мемлекеттік органдарға ықпал етті. Өз кезегінде көлік комитеті 15 сәуірден бастап бақылау бекеттерінде көлік жүргізушілеріне берілген қағаз рұқсатнаманы тексермеу туралы шешім шығарды. Тексеру шаралары көлік комитетінің көліктік деректер базасының ақпараттық-талдау жүйесі арқылы атқарылатын болды.

Бақылау бекеттерінің «жасыл дәлізі» арқылы өту үшін жүк тасымалдаумен айналысатын компаниялар электронды үкімет порталына өтінім беріп, рұқсат алуға тиіс. Рұқсат алушы заң бойынша санитарлық-эпидемиологиялық талаптарды қатаң сақтауға, көлік жүргізушілері мен тұтынушылардың қауіпсіздігін қамтамасыз етуге міндеттеледі. Заңға қайшы әрекет еткен жағдайда тасымалдаушы компаниялардың басшылары әкімшілік, қылмыстық жауапкершілікке тартылады. Бақылау бекеттерінен кедергісіз өту рұқсаты ірі көлемді және ауыр салмақты автокөлік құралдарына, 1, 6 және 7-санаттағы қауіпті жүктерді тасымалдаушыларға және халықаралық бағытта жүк жеткізумен айналысатын автожүргізушілерге беріледі.

Естеріңізге салайық, Қазақстан халқына арнаған телевизиялық үндеуінде Президент Қасым-Жомарт Тоқаев: «Қазақстан Республикасының аумағынан шығуға және кіруге шектеу енгізіледі. Бірақ жоғарыда аталған шаралардың жүк тасымалына қатысы болмайды», – деген болатын.

Абылай Бейбарыс

Аграрлық саладағы импорттың үлесін қалай азайтуға болады?

«Атамекен» ҚР ҰКП Мәжіліс депутаттарының алдында бір жылғы жұмыстарының есебін берді.  

30 Қараша 2019 12:40 2404

Аграрлық саладағы импорттың үлесін қалай азайтуға болады?

«Атамекеннің» сарапшылық пікірінсіз, бағалауынсыз көптеген заңнама қабылданбайды. Біздің жұмыс топтарымызда Палата мамандары үнемі талқылауға қатысады. Бүгінгі нарықтық экономика жағдайында кәсіпкерліктің маңызы зор. Кездесу басталмай тұрып Палата басшысы Тимур Асқарұлы екеуміз 9 негізгі бағытты қамтитын 2020 жылға арналған ынтымақтастық туралы меморандумды жүзеге асырудың Жол картасына қол қойдық», – деді кездесуді бастаған ҚР Парламент Мәжілісінің төрағасы Нұрлан Нығматулин.

Аталмыш жол картасы мынадай бағыттарды қамтиды:
1. Бизнесті қорғау және сыбайлас жемқорлыққа қарсы іс-қимыл
2. Салық-бюджет саясатын жетілдіру
3. Мемлекеттік сатып алу, отандық тауар өндірушілерді қолдау
4. Сәулет, қала құрылысы және құрылыс қызметі және жер қатынастары саласындағы мәселелерді шешу
5. Мемлекеттік-жеке меншік әріптестік саласындағы мәселелерді шешу
6. Аймақтық даму (ауылдағы кәсіпкерлікті дамыту)
7. Тұтынушылар алдындағы бизнес жауапкершілігін күшейту 

«Атамекен» ҚР Ұлттық кәсіпкерлер палатасының төралқа төрағасы Тимур Құлыбаев депутаттарды Палатаның жалпы қызметімен, жобаларымен таныстырды. Оның ішінде тұтыну несиелері, нақты сектор, саналы протекционизм, маман даярлау, т.б. мәселелер қамтылды.

Палатаның басқарма төрағасының орынбасары Эльдар Жұмағазиев өз баяндамасын ауыл шаруашылығындағы несие мәселесіне арнады. Ол «ҚазАгро» арқылы қаржыландыру көлемі өсіп, 2-деңгейлі банктер арқылы қаржыландыру 3 еседей төмендегенін атап өтті.

Спикердің пікірінше, ауыл адамдарына арналған агрокомпетенция орталықтарының маңызы зор. Технологияны сақтау секілді қарапайым да қажетті машықтарды шаруаларға үйретудің маңызы артып отыр.

«Саладағы импорт мәселесі толғандырады. 2009-2019 жылдары 8 млрд доллардың өнімі сырттан алынған. Еліміз аграрлық мемлекет бола отырып, азық-түлікті сырттан аулға мәжбүрміз. Мұндағы сүт өнімдерінің үлесі – 32,3%. Біздің есебімізше, аграрлық салаға 654 млрд инвестиция салынып, 400 млрд субсидия бөлінген жағдайда, импорттың орнын жабуға болады. Нәтижесінде 275 млрд теңге елде қалады», – деді Эльдар Жұмағазиев.

«Атамекен» өкілі мұғалімдер мәселесін де көтерді. Оларға артылатын жүктеме де, сондай-ақ, зейнет жасы да ұлғайып келе жатқандықтан, айлықты өсіру қажет екенін айтты. Ол, сондай-ақ, педагогикалық оқу орындарынан шыққан түлектердің 65%-ы өз мамандығы бойынша жұмыс істемейтінін тілге тиек етті. Аграрлық мамандыққа оқыған студенттердің 89%-ы да ырзығын басқа саладан тауып жүр.

Баяндамашы нарыққа қажет мамандықтардың теңгерімсіздігіне тоқталып, Ақтөбе облысындағы жағдайды мысалға келтірді. Өңірде 300 тракторшы қажет болғанымен, бір жылда 53 маман даярланған. Ал аспаздар, керісінше, сұраныстан артық даярланған.

«Атамекен» еңбек нарығына сауалнама жүргізу арқылы 35 мың компанияның пікірін білген екен. Отандық кәсіпорындарға биыл – 52 мың, 2020 жылы – 38 мың, 2021 жылы 35 мың маман қажет. Колледждерді салаға жіктеп, мемлекеттік тапсырысты бөлу кезінде осы деректер ескерілмей отыр. Кәсіпкерлерді қолдау бойынша «Бір терезе» қағидаты бойынша қызмет көрсету мөлшері 2 есеге түсті. Қаржылай емес қолдау бағытында «Бизнеске арналған үкімет» бірыңғай қызмет көрсету сервисінің келешегі зор. 26984 мекеме ашылды, 45 мың жоба пайда болып, 841 млрд салық төленді», – деді Эльдар Жұмағазиев.

«Атамекен» қолға алған тағы бір жоба – Субъектілер скринингі. Ауылдарға басымдақ бере отырып жүргізілген мониторинг пен сауалнама аясында 4 миллион респондент, 2,8 миллион жеке шаруашылық сараптаудан өтті. Енді осы бағыт бойынша «Атамекен» өңірлік бағдарламалар дайындауды қолға алмақшы. Келесі жылдан бастап, бұл нәтижелерді смартфондағы арнайы қосымшадан көруге болады.

Эльдар Жұмағазиев баяндамасынан кейін депутаттардың сауалдарына жауап берді. Арнайы экономикалық аймақ, индустриялық аймақ, бизнестің жол картасы және тағы басқа мәселелер бойынша өзекті сұрақтар қойылып, толымды жауап берілді.  

Ал Палата төрағасы Абылай Мырзахметов депутаттардың «Бастау» жобасына қатысты сауалдарына жауап берді.

Бүгінде жоба аясында жұмыссыздар мен өзін-өзі қамтушылардың 60%-ы бизнес-жобаларын тұрақты тқоғап келеді. «Атамекен» Үкімет қойған 20%-дық индикаторды 27-ге жеткізген. Абылай Мырзахметов салаға бөлінетін шағын несие көлемін  арттыру қажеттігін атады. Сол арқылы өз ісін бастағандардың үлесін арттыруға болатыны да айтылды. «Бастау» арқылы бизнестің әліппесін меңгеріп, ісін бастаған 26 мың адамның 93%-ы бүгінде салық төлеп отыр.

Сөз соңында ҚР Парламент Мәжілісінің төрағасы Нұрлан Нығматулин «Атамекен» басшылығына алғыс білдіріп, палата жұмысына оң баға берді. Келешекте аталған жобалар бойынша бірлескен жұмыстар жалғасын таппақ.