DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 324,92 Brent 36,55
Павлодарлық 1747 кәсіпкердің қарызы кешірілді

Павлодарлық 1747 кәсіпкердің қарызы кешірілді

Салықтық рақымшылық акциясының аяқталуына үш ай қалды.  

06 Қазан 2019 17:23 8059

Павлодарлық 1747 кәсіпкердің қарызы кешірілді

Автор:

Фархат Әміренов

2019 жылдың 1 қаңтарынан басталған салықтық амнистия аясында павлодарлық 1747 кәсіпкердің салықтық қарызы кешірілді. Рақымшылық акциясына 2018 жылдың 1 қазанына дейін жинақталған салықтық берешектер жатқызылған болатын. Осылайша, республика бойынша жинақталған қарыз көлемі 210,4 млрд тегені, ал қарыз үшін есептелген өсімпұл 122,9 млрд теңгені құрады. Бұл ретте, Павлодар облысы бойынша 11,7 млрд теңге қарыз бен 7 млрд теңге айыппұл есептелген еді.

Павлодар облыстық Мемлекеттік кірістер департаментінің басшысы Бауыржан Айнабековтің айтуынша, 2019 жылғы 30 қыркүйектегі жағдай бойынша, павлодарлық кәсіпкерлердің 391,8 млн теңге салықтық қарызы және 73,6 млн теңге айыппұл мен өсімпұл кешірілген. Бұл ретте, Павлодар облысы бойынша қалыптасқан ең көп өсімпұлдардың көлемі 6 млн теңгеге дейін жетіп отыр.

Облыс бойынша есептелген қарыз бен кешірілген соманы салыстырсаңыз, жергілікті кәсіпкерлердің анау айтқандай белсенділік танытып отырмағанын аңғаруға болады. Бұл павлодарлық кәсіпкерлер тамаша мүмкіндікті пайдаланбай отыр деген сөз.

Еске сала кетейік, салықтық рақымшылық акциясы 2020 жылдың 1 қаңтарына дейін жалғасады. Демек, шағын және орта бизнес субъектілерінің салықтық берешектерден құтылуына толық үш ай қалып отыр. Мұндай акциялар бұған дейін 2005 және 2013 жылдары ұйымдастырылған болатын.

«Акцияның мақсаты – 2018 жылдың 1 қазанына дейін салықтық берешек арқалап келген кәсіпкерлік субъектілерін қолдау, бизнеске мүмкіндік беру. Кәсіпкерлер қарыздың негізгі бөлігін өтеген жағдайда, олардың өсімпұлдары мен айыппұлдары кешіріледі», – дейді департамент басшысы.

Ал осы жылдың шілде айынан бастап рақымшылық акциясы жеке тұлғаларға да қолданыла бастады. Яғни, өткен жылдың 1 қазанына дейін жер, мүлік, көлік салықтары бойынша қарыз арқалаған тұрғындар берешектің негізгі бөлігін өтеп, артық қарыздан құтыла алады. Бүгінде 16 мың павлодарлықтың шамамен 150 млн теңге өсімпұлы кешірілген. Бұл ретте, Павлодар облысы жеке тұлғалардың салықтық қарызын кешіру бойынша республикада алдынғы қатарда тұр.

Мемлекеттік кірістер департаментінің түсіндіру жұмыстары бөлімінің басшысы Галина Бирюкованың айтуынша, акция аясындағы түсімдер көбея түспек. Өйткені, Қаржы министрінің бұйрығы бойынша акцияға толықтырулар енгізіліп отыр.

«Салықтық амнистияға жатқызылатын шағын және орта бизнес субъектілерінің саны көбейтін болды. Біріншіден, салықтық тексеру нәтижесінде салық және басқа да міндетті төлемдер 2018 жылғы 1 қазанға дейін есептелсе де, бірақ тексеру нәтижелері туралы хабарламаны шағымдануға немесе хабарламаны орындау мерзімі келмеуіне байланысты 2018 жылғы 1 қазандағы жағдай бойынша берешегі жоқ салық төлеушілер де акцияға қатысатын болды. Бұл бір.  Екіншіден, 2018 жылғы 1 қазаннан кейінгі кезеңде 2018 жылғы 1 қазанға дейінгі салықтық кезеңге қосымша есеп тапсырған салық төлеушілер де салықтық рақымшылықпен қамтылады. Бұдан бөлек, салықтық есеп бойынша айыппұл сомасын есептен шығару оны 2019 жылғы 1 шілдеге дейін төлемеген жағдайда ғана жүргізіледі», – дейді Галина Бирюкова.

Белгілі болғандай, рақымшылық акцияға қатысушылар тізімі кеңейтілгеннен кейін павлодарлық 9 кәсіпкер мүмкіндікті пайдаланған. Олар салықтық тексерулердің нәтижесі бойынша және 10 млн теңгеге жуық қосымша есептер ұсыну арқылы есептелген қарызды төлеген. Нәтижесінде 1,5 млн теңге айыппұлдан құтылды.

Фархат Әміренов

inbusiness.kz-ті қараңыз, оқыңыз :

Төтенше жағдай: Павлодар бюджеті 2 млрд теңгеден қағылады

Павлодар облысы бойынша 20 мыңнан астам бизнес субъектісі салықтық жеңілдіктерді пайдаланады.  

07 Мамыр 2020 15:14 1030

Төтенше жағдай: Павлодар бюджеті 2 млрд теңгеден қағылады

Фото: akorda.kz

Елдегі төтенше жағдайға байланысты мемлекет шағын және орта бизнесті қолдауға бағытталған түрлі шараларды қолға алғаны белгілі. Солардың бір бөлігі – салықтық жеңілдіктер. Яғни, Үкімет пандемия кезінде зардап шеккен кәсіп иелерін түрлі салықтан босатып, қолдау көрсетуде.

Павлодар облыстық мемлекеттік кірістер департаменті басшысының міндетін атқарушы Бауыржан Айнабековтің айтуынша, төтенше жағдай кезінде шағын және орта бизнес субъектілеріне барынша қолдау көрсету мақсатында қабылданған нақты шаралар жұмыс орындарын сақтап, жалақының уақытылы төленуін қамтамасыз етуді, жалпы, экономиканы тұрақтандыруды көздейді.

Мәселен, 2019 жылдың міндеттемелері бойынша салықтық есеп беру мерзімі 31 наурыздан 31 мамырға шегерілді. Шағын және орта бизнес субъектілері үшін салықтың барлық түрлері бойынша төлемдер 1 маусымға дейін шегерілді. Сондай-ақ, мәдени, дене шынықтыру-сауықтыру, қонақ үй, туризм, мейрамханалық, ойын-сауық бағытында қызмет көрсететін объектілер мүлік салығынан босатылып отыр.

«Ірі сауда орталықтары, мейрамхана, кинотеатрлар мен театрлар, ойын-сауық орталықтары жыл соңына дейін мүлік салығынан босатылып отыр. Бұл санатқа кіретін облысымызда 282 салық төлеуші бар. Сонымен бірге, елімізде әлеуметтік маңызы бар азық-түліктің 19 түрі бойынша бағаның негізсіз өсуінің алдын алу үшін де нақты шара қолданылып отыр. Яғни, мұндай азық-түлікті импорттау, сатумен айналысатын кәсіпкерлер үшін қосымша құн салығының мөлшерлемесі 12 пайыздан 8 пайызға төмендетілді. Облыста 122 салық төлеуші осындай көмек алады», – деді Бауыржан Айнабеков.

Сонымен қатар, сауда-саттық, ойын-сауық, туристік, қонақ үй бизнесімен айналысатын кәсіпкерлер биыл 1 сәуірден 1 қазанға дейін жалақы, жеке табыс салығы, әлеуметтік салық, әлеуметтік төлемдерден босатылады. Бұл жеңілдік облыстың 14 мың шағын және орта бизнес субъектісіне қатысты болмақ. Сондай-ақ, 8 ірі кәсіп иесі бір тоқсанға, яғни 1 шілдеге дейін салықтан босатылған.

Ресми дерекке сүйенсек, облыста 1 сәуірдегі мәлімет бойынша 12 мың 806 заңды тұлға және 30 254 жеке кәсіпкерлік тіркелген. Солардың ішінен 20 477 заңды тұлға мен жеке кәсіпкерлік субъектісі мемлекет тарапынан қолға алынған шаралардың шарапатын көреді.

«Аймағымызда 20 мыңнан астам бизнес субъектісіне жасалатын салықтық жеңілдіктерден жыл соңына дейін қазынаға 2 млрд 400 млн теңге түспейді деп болжанып отыр. Яғни, 14 мың шағын және орта бизнес субъектісі 1 қазанға дейін түрлі салықтан босатылатынын айттық. Соның есебінен 1,5 млрд теңге салық қазынаға түспейді. 282 салық төлеушіні мүлік салығынан босатудан 151 млн теңге, қосымша құн салығы мөлшерлемесін төмендетуден 231 млн теңге және ірі 8 кәсіп субъектісіне жасалатын жеңілдіктен 118 млн теңге бюджетке аударылмайды», – дейді Бауыржан Айнабеков.

Фархат Әміренов

380 млрд теңге кәсіпкерлердің қалтасында қалады

Биыл республикалық бюджетке 108 млрд теңге салық кем түседі.

05 Ақпан 2020 13:12 4413

380 млрд теңге кәсіпкерлердің қалтасында қалады

2020 жылдың 1 қаңтарынан 2023 жылдың 1 қаңтарына дейін жеке кәсіпкерлер жеке табыс салығынан, заңды тұлғалар корпоративті табыс салығынан, оңайлатылған декларация негізіндегі арнаулы салық режимімен жұмыс істейтін кәсіпкерлер әлеуметтік салықтан, ал бірыңғай жер салығын қолданатын фермерлер мен шаруа қожалықтары жер салығынан босатылды.

Сонымен қатар алдағы 3 жылда шағын және орта бизнес субъектілерін тексеруге тыйым салынды. Бұған Президент Қасым-Жомарт Тоқаевтың 2019 жылғы 26 желтоқсандағы «Қазақстан Республикасында тексерулерге және профилактикалық бақылау мен қадағалауды барып жүргізуге мораторий енгізу туралы» №229 жарлығы мен салық заңнамасына енгізілген толықтырулар мен өзгерістер негіз болды.

Айтпақшы, есірткі құралдарының, психотроптық заттар мен прекурсорлардың айналымына байланысты қызметті, акцизделетін өнім өндіруді немесе көтерме саудада сатуды, астық сақтау мен лотерея өткізуді, ойын бизнесі саласындағы қызметті, радиоактивті материалдар айналымына байланысты қызметті, банкті және сақтандыру нарығындағы қызметті (сақтандыру агентінің қызметінен басқа), аудиторлық қызметті, бағалы қағаздар нарығындағы кәсіби қызметті, кредиттік бюро мен күзет саласындағы қызметті, азаматтық және қызметтік қарумен оның патрондарының айналымына байланысты қызметті, жер қойнауын пайдалану, оның ішінде алтын іздеуге қатысты қызметті, табиғи қазба байлық сату бойынша қызметті, мұнай өнімдерінің жекелеген түрлерін бөлшек саудаға шығаруды және сыртқы экономикалық қызметті жүзеге асырумен айналысатын салық төлеушілер мораторийден тыс қалды. Бұл туралы кәсіпкерлік кодексінде жазылған.

Біле жүріңіз, кәсіпкерлік кодексіне сәйкес, қызметкерлерінің саны 15 адамды құрайтын және жылына шамамен 75 млн теңге табатын кәсіпкерлер микрокәсіп иесі, ал 100-ге жуық жұмысшысы бар, орташа жылдық табысы 757 млн теңгеге жететін кәсіпкерлер шағын бизнес өкілі саналады. Осы санатқа жататындар алдағы 3 жылда салық төлемейді.

Қаржы министрі Әлихан Смайыловтың дерегінше, елімізде 1 млн 308 мың микро және шағын бизнес субъектісі бар. Олардың 1 млн 236 мыңы арнайы салықтық режимді пайдаланады. Бұған дейін олар жалпы табысының 2- 3%-ын қазынаға аударып отырды.  

Мемлекеттік кірістер комитеті төрағасының орынбасары міндетін атқарушы Жәнібек Нұржановтың мәлімдеуінше, салықтық жеңілдік кезінде 380 млрд теңге кәсіпкерлердің қалтасында қалады

«Алдағы 3 жылда республикалық бюджет 380 млрд теңге салықтан қағылады. Ал биыл республикалық бюджетке 108 млрд теңге салық кем түседі», – деді Жәнібек Нұржанов

Оның сөзінше, 1 млн 200 мыңнан астам микро және шағын бизнес субъектісі салық жеңілдігіне ие болып отыр. Олардың бюджетке аудармаған салығының шығыны салықтық және кедендік әкімшілендіруді жақсарту есебінен қайтарылады.

Жәнібек Нұржанов бизнес субъектілерін тексеруге жарияланған 3 жылдық мораторийді де тілге тиек етті.

«Салықтық тексеру уақытша тоқтатылады. Кәсіпкерлер адал кәсіп жүргізу, көлеңкелі экономикадан бас тарту мәдениетін меңгеруі тиіс», – деді мемлекеттік кірістер комитеті төрағасының орынбасары міндетін атқарушы.

Республикалық бюджетке алдағы 3 жылда түспейтін 380 млрд теңге салық ел экономикасына кері әсерін тигізбейді екен. Осы турасында макроэкономикалық зерттеулер орталығының директоры, экономист Олжас Құдайбергенов: «Микро және шағын бизнесті салықтан босату қазына қаржысы үшін үлкен шығын емес. Ал кәсіпкерлер үшін маңызды әрі қажет қолдау. Экономикасы мықты елдердің барлығы әу баста микро және шағын бизнеске көмек көрсеткен. Кейін кәсіпкерлер бюджетке салық түрінде қомақты қаржы аударып, елдің макроэкономикасын алға жылжытқан»,– деді.

Абылай Бейбарыс

inbusiness.kz-ті қараңыз, оқыңыз :

Жаңалықтарға жазылу: