DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 323,36 Brent 36,55
Екі миллиондай «көне» көліктен қашан арыламыз?

Екі миллиондай «көне» көліктен қашан арыламыз?

Қазақстандықтарға әбден көнеріп, жүрістен қалған «темір тұлпарларын» мемлекетке тапсырып, қомақты сыйақы алудың тамаша мүмкіндігі екінші рет беріліп отыр.

12 Шілде 2017 14:55 5033

Екі миллиондай «көне» көліктен қашан арыламыз?

Автор:

Бақыт Көмекбайұлы

Фото: inform.kz

2017 жылдың 26 маусымынан бастап елімізде тозығы жеткен көліктерді тапсырушыларға жаңа көлік сатып алуына жеңілдік беретін сертификат бағдарламасы жаңадан іске қосылды.

Осы бағдарламаның орындалуына жауапты энергетика министрлігі мен оның «ӨКМ (өндірушілердің кеңейтілген міндеттемелері) операторы» әрбір жеңілдік сертификаты атаулы болып келетінін, бірақ оны өзгенің атына тіркеуге болатынын еске салады. Бұл ретте басқа біреуге тіркеу екі реттен артық жүргізілмейді. Бірақ бұл сертификатты мемлекетке қайтарып беруге және қолма қол ақшаға ауыстыруға тыйым салынған. Сертификат тіркелген күннен бастап 12 айға дейін жарамды. Осы уақыт ішінде «автохлам» тапсырушы адам мемлекет берген сертификаттағы қаржыны пайдаланып, жаңа автокөлік сатып алып үлгеруі қажет.

«Тозығы жеткен көлік құралдарын жою бағдарламасы отандық парктің жаңаруына, Қазақстандық автоөндірісті ынталандыруға және утилизация саласының инфрақұрылымын қалыптастыруға мүмкіндік береді», – деген ұстанымда энергетика министрлігі.

ӨКМ операторы жаңа өндірістік кезеңге көшті: бұдан былай автокөліктер қабылданатын бекеттерде олар бірден жоюға әзірлене бастайды. Яғни, экологиялық талапты сақтай отырып автокөлікті тасымалдау және оны жою процесі былай жүрігізіледі: аккумулятор, шиналар шешіп алынады, техникалық сұйықтар стандартқа сай арнайы ыдысқа құйып алынады.

«ӨКМ операторы» ЖШС-ның атқарушы директоры Сергей Юрчаның айтуынша, утилизациялауды қажет ететін көнерген көліктерді қайта өңдеу Қарағанды қаласындағы өндірістік алаңда жүзеге асырылады. Осы саладағы бірінші зауытқа айналып отырған бұл кәсіпорынның жылдық қуаттылығы шамамен 50 мың автокөлік бірлігін құрайды деп жоспарланған.

Оның мәліметінше, ескі көліктерді қабылдау бойынша былтырғы алғашқы пилоттық бағдарлама аясында шамамен 15 мың дөңгелек-шина, 14 мың аккумулятор, шамамен 4 мың тоннадай пайдаланылған машина майы жиналыпты. Олар осы салаларға маманданған кәсіпорындарға жөнелтілмек. Ал тозығы жеткен машиналардың темір-метал қалдықтарының барлығы Қарағандыдағы автозауытқа жеткізілуде.

«Көлік құралдарынан алынған барлық құрамдас бөліктер Қазақстанның өз ішіндегі утилизациялауға бағытталады. Тиісті кәсіпорындар бізде бар және оператормен белсенді жұмыс жасауда», – дейді Сергей Юрча.

ӨКМ операторы мәліметінше, бұл көліктерді кәдеге жаратудың «тереңдігі» 90%-дан кем болмайтын көрінеді.

Сонымен, жедел ақпарат бойынша бағдарлама бастау алған екі аптадай уақыт ішінде беріліп отырған осы екінші мүмкіндікті қазірдің өзінде 32 көлік иесі пайдаланып үлгеріпті.

«Тозығы жеткен көлік құралдарын жою бағдарламасы» аясында ӨКМ операторы жаңа көліктерді сатып алуға мүмкіндік беретін осынша жеңілдік сертификатын табыстады.

Оның ішінде 5 сертификат иегері ізін суытпай, берілген қаржыны жаңа көлік сатып алу кезінде жедел пайдаланған екен. Бұрыннан жоспарлап, таңдап қойса керек.

Әзірше ескі көліктерді тапсырудан Қостанай қаласы көш бастап тұр. Онда осы бағдарлама бойынша 5 көлік мемлекетке өткізілді. Одан кейінгі тұғырға 3 көлікпен Шығыс Қазақстан облысы жайғасты.

Қазіргі кезде жалпылай алғанда, 1 автобус, 5 жүк көлігі мен 26 жеңіл автокөлік жоюға тапсырылып отыр. Бұлардың барлығы 1980-1993 жылдар аралығында шыққан, яғни қолданыста болғанына кем дегенде ширек ғасырдай уақыт өткен көліктер.

Ресми мәлімет бойынша осы көліктерге ең төмен дегенде 315 мың теңге (жеңіл көлік) және ең қымбат дегенде 650 мың теңге (Neoplan автобусы) төленген.

Биылғы жылы энергетика министрлігі тозығы жеткен көлік құралдарын жою бағдарламасы бойынша жаңа көлікті жеңілдік сертификатымен сатып алуға «М1», яғни жеңіл көлік санаты бойынша – 20 мың ескі автокөлікке, «М2», «N1», «N2», яғни жолаушылар және жүк көлігі санаты бойынша – 1 мың 836, «М3», «N3», яғни салмағы 5 тоннадан жоғары жолаушылар тасымалдаушы көліктер және 12 тоннадан жоғары жүк көліктері бойынша – 1 мың 164 көлік құралдарына квота бөліп отыр.

Дегенмен, бағдарламаның қарқын алуына қарай бұл квота кеңейтіледі деп күтілуде. ӨКМ операторы 2017 жыл қорытындысында халықтан барлығы 40 мыңдай автокөлік жиюға ниет білдіруде.

Өткен жылғы ізашар бағдарламаның қорытындысы осыдан үміттенуге түрткі болса керек. Атап айтқанда, ӨКМ операторы дерегінше, 2016 жылдың 21 қарашасы мен 2017 жылдың 13 маусым айы аралығында елімізде алғашқы «Тозығы жеткен көлік құралдарын ынталандыру бағдарламасы» бойынша қабылдау бекеттеріне 23 мың 30 автокөлік тапсырылды. Ескі көліктерді тапсыру бойынша Шымкент қаласы бірінші орынды иеленді. Оңтүстікқазақстандықтар 2 980 автокөлік өткізіп отыр. Тозған техникадан арылу көрсеткіші бойынша Қостанай қаласы 1 825 ескі көлікпен екінші тұғырға көтерілді. «Үштікті» 1 597 көлікпен Алматы облысы тұйықтады.

Айта кету керек, былтыр тек жеңіл көліктер ғана қабылданған және барлық талап етілетін компоненттері толығымен бар ескі «темір тұлпарларға» ең көп дегенде 150 мың теңге төленген. Осылайша, бірінші бағдарлама аясында қазақстандықтарға 3 миллиард 440 миллион 700 мың теңге ақшалай өтемақы жасалыпты.

Бұл ретте мемлекеттің кәдеге жаратуына тапсырылған көнерген «темір тұлпарлар» арасындағы ең көбін «ВАЗ-2105», «ВАЗ-2106» және «ВАЗ-2101» құрапты. Сонымен қатар тозығы жеткен машиналардың арасында «Мазда», «Фольксваген», «Хонда» сияқты шетелдік автокөліктер кездеседі. Ең әйгілі маркілердің арасында 1996 шыққан «Toyota Land Cruiser» және 1985 жылы шығарылған «Porsche» маркілі автокөлік тапсырылды.

Жоюға өткізілген көліктердің орташа шығарылған уақыты 25-30 жыл. Бағдарлама бойынша тапсырылған ең ескі көлік – 1946 жылы шығарылған «Москвич» автокөлігі. Оны Семей қаласының тұрғыны өткізген. «Су жаңа» деген көлік 2014 жылы шыққан «Лада 21901» автокөлігі болды.

Биылғы жылы шетелде өндірілген маркалар үстем болады деп күтілуде.

Ауласында тот басып тұрған жүрмейтін көлігін тапсырып, жаңа көлікті алуға қажетті қаржыны толықтыруды қалаған азаматтарға энергетика министрлігі бұл арманын жүзеге асырудың қарапайым «төрт қадамын» ұсынады.

Біріншіден, сол көлікке қатысты «квотаның бар-жоқтығын анықтау», бұл үшін 8 800 080 08 65 телефоны бойынша тексеріп алуға болады.

Екіншіден, «көліктің тапсыруға жарайтын-жарамайтынын бағалау».

Үшіншіден, «машинаның өз меншігіңізде екенін растайтын құжаттарды әзірлеңіз». Автокөлікті өткізушінің құжаты жіті тексерілетін болады. Егер құжат күмән туғызса, оператор 3 жұмыс күннің ішінде қабылданған құжаттардың дұрыстығын анықтау мақсатында құқық қорғау органына тапсырады.

Төртінші қадам «тозығы жеткен көлікті тапсыруды» қарастырады. Яғни, оны өз қалаңыздағы және өңіріңіздегі қабылдау бекетіне өзіңіз жеткізуге тиіссіз.

Оператор көліктер Астана, Алматы, Өскемен, Семей, Павлодар, Ақтау, Ақтөбе, Көкшетау, Қостанай, Қызылорда, Орал, Шымкент, Қарағанды, Тараз, Атырау, Петропавл және Талдықорған қалаларында қабылданатынын еске салады.

Жоюға тапсырылатын көлік құралдарының шығарылған жылына, моделіне қатысты ешқандай да шектеу жоқ. Тек жолаушылар тасымалдайтын және жүк көліктері үшін жалғыз талап – М3, М3, N2, N3 санатындағы көлік құралдары техникалық жарамды болуы керек және барлық жабдықтар өз орынында болу тиіс.

Осы тұста «көліктің тапсыруға жарайтын-жарамайтынын бағалау» бойынша екінші қадамға түсініктеме бере кеткен жөн. Мемлекет қабылдау үшін ескірген жеңіл көліктің (М1 санаты) шанағы, шассиі, қозғалтқышы, радиаторы, беріліс қорабы, аккумуляторы, капот қақпағы, жүксалғыш қақпағы, есіктері, дөңгелектері, дөңгелек қоршаушы жабыны, меңгерікті басқару жүйесі болуға тиісті.

Жолаушылар көлігі (M2, М3 санаты) жүріп тұруы керек, сондай-ақ оның шанағы, шассиі, қозғалтқыш аспалы құрылғысы, қозғалтқышты салқындатушы радиаторы, беріліс қорабы, аккумуляторы, есіктері, дөңгелектері, газдарды сыртқа шығаратын жүйе детальдары (егер бар болса), өзге де салқындатқыш жүйелер немесе сұйықтықтары, таратқыш қорабы, белдемелері және белдеме редукторы, ірі торапты детальдары, жүрісті бөлік, кардан білігі, меңгерікті басқару жүйесі болуы талап етіледі.

Жүк көлігінің (N санаты) кабинасы, шассиі, қозғалтқыш аспалы құрылғысы, таратқыш қорабы, белдемелер және белдеме редукторы, ірі торапты детальдары, жүрісті бөлік, кардан білігі, меңгерікті басқару жүйесі, қозғалтқышты салқындатушы радиаторы, беріліс қорабы, аккумуляторы, есіктері, дөңгелектері, сорғы сияқты гидравликалық құрылғылары (компрессор) бак, цилиндрлері, таратушысы секілді барлық талап етілетін құрылымдары болса, тапсыруға таси беруіңізге болады.

Бағдарлама талабына бойынша ескі техниканы өткізушіге атаулы сертификат беріледі. Ол сертификаттың құны тапсырлатын көлік құралының санатына байланысты 315 мың теңгеден 650 мың теңге аралығында болады.

Бағдарлама бойынша отандық өндірушіден кез келген санаттағы көлік құралын сатып алғанда жеңілдік сертификатын пайдалануға болады. Және де бір автокөлік сатып алғанда 2 сертификатқа дейін пайдалануға мүмкіндік бар.

Тозығы жеткен көлік құралдарын жою бағдарламасы негізінде қандай автокөліктерді жеңілдікпен алуға болатындығын төмендегі сайттардан және телефон нөмірлерінен көруге болады: «БИПЭК АВТО» – www.bipek.kz немесе: 8 778 746 0698 телефоны бойыншы, AllurAuto дилерлік орталығы сайтынан: www.allurauto.kz, www.jac-motors.kz, «Astana Motors», «Вираж», «УЗАВТО АЗИЯ» дилерлік орталықтарынан: www.ssangyong.kz, www.peugeot.kz, www.iveco.com/kazakhstan, сондай-ақ 8 800 070 55 88 и 8 701 737 12 71.

Сертификат иелеріне қандай жаңа автокөлік – мейлі, жеңіл, мейлі, жүк көлігін сатып алам десе де, шектеу жоқ. Сертификат бойынша қазақстандық өндірушілер 115 автокөлік түрін ұсынып отыр. Оның ішінде жеңіл автокөліктен бастап, жүк көлігіне дейін кіреді.

Қазіргі кезде Қазақстанда ресми мәлімет бойынша көліктер саны 4 миллионға жуықтады. Дегенмен, сарапшылар олардың 2 миллионнан астамы ескірген көліктер екенін айтады. Бұлар ауаны ластайды, техникалық ақауларының жиі туындауы ықтималдығы бойынша жол қауіпсіздігіне қауіп төндіреді. Сондықтан мемлекеттің азаматтарды оларынан арылуға ынталандыруы жөн-ақ. Әйтпесе, қалай дамыған елдер «отыздығына» кіреміз...

Бақыт Көмекбайұлы

inbusiness.kz-ті қараңыз, оқыңыз :

«ӨКМ операторының» сертификаттары «жанып» кетті

Оператор мен «Бипэк Авто» бірін-бірі айыптап отыр.

24 Мамыр 2020 13:56 856

«ӨКМ операторының» сертификаттары «жанып» кетті

Қазақстанда көнерген көліктер утилизацияға қайтадан қабылдана бастады. Қабылдау карантинге бола тоқтатылған-тын. Істен шыққан «темір тұлпарлар» жиналатын бекеттер алдымен Нұр-Сұлтан, Ақтау, Атырау, Талдықорған, Семей, Көкшетау қалаларында, сондай-ақ СҚО мен БҚО-да қайта ашылды. Олардың ізін ала өзге қалаларда осындай орындар жұмысқа кірісіп жатыр. 

Кәдеге жараудан қалған автомобильдерді иелері ақшаға немесе сертификатқа айырбастай алады. Мұндай сертификат тек елімізде құрастырылған машиналарды сатып алғанда ғана жеңілдік әпереді. Жеңілдіктің көлемі утилизацияға берілген автоның санат-категориясына байланысты 315 мыңнан 750 мыңға дейін барады. Мысалы, ең жоғарғы сертификаттан автобус тапсырғандар үміттене алады.

2019 жылдың қорытындысында 10 мың 673 қазақстандық ескі-құсқы көлігін табыстап, ақша алыпты. Ал 25 мың 151 автокөлік қожайыны сертификатты таңдаған. Өйткені Өндірушілердің (импорттаушылардың) кеңейтілген міндеттемелері бағдарламасын басқару үшін құрылған «ӨКМ операторы» ЖШС сертификаттарды көп жарнамалайды. Көне екі машинаны тапсырғаны үшін алған қос сертификатты біріктіріп, бір жаңа көлік алуға болады екен. Сертификатты басқа адамдар атына 3 ретке дейін қайта тіркеуге мүмкіндік бар көрінеді. 

Алайда оны алғандар енді өкініп отыр. Себебі сертификат 12 айға ғана беріледі. Айналдырған екі зауыт – Өскемендегі «Азия Авто» мен Қостанайдағы «СарыарқаАвтоөнеркәсіп» құрастырған автокөліктердің бағасы қымбат. Содан біраз адам олар қашан науқан жариялап, арзандатады деп күтіп жүргенде елде екі айға жуық ТЖ енгізілді.

Жамбыл облысының Шу қаласының тұрғыны, зейнеткер Құралбек Дауылбаев «ӨКМ операторының» адам құқығын таптаған өктемдігіне қапалы.

«Мен ескі көлігімді Алматы облысының Қаскелең қаласындағы қабылдау бекетіне апарып тапсырдым. Қолыма сертификат ұстатты. Машинам жапырылып, утилизацияға кетіп те қалды. Сертификаттың қолданыс мерзімі 2020 жылғы 18 мамырға дейін созылды. Алайда Қазақстанда төтенше жағдай және жүріс-тұрысқа қатаң шектеулер енгізілді ғой, сондықтан оны уақытында пайдалана алмай қалдым. Жасым 71-де. Қозғалысым онсыз да шектеулі. Карантинге орай тіпті кредит төлеуді де кейінге қалдырды емес пе?! Демек, бұлар да мүмкіндік берер деп, «оператор РОП»-қа хабарлассам, олар сертификат мерзімін сәл ұзартудан да үзілді-кесілді бас тартты», – деп қынжылады қария.

Пандемияның жайылуына, мемлекеттің карантин жариялауына қарапайым азаматтардың еш қатысы да, кінәсі де жоқ. Олай болса, мемлекет тудырған осы монополистің неге қыңырланып, елге зиянын тигізіп отырғаны түсініксіз. Нәтижесінде, қазақстандықтар адал сатып алып, қаншама жыл салығын төлеп, жөндеуіне қыруар шығын шығарып келген автомобилін осы жеке компанияға тегін тапсырған, оның ел есебінен негізсіз байи түсуіне үлес қосқан болып шығады.

Халықтың тілегі орындалмайтынын экология, геология және табиғи ресурстар министрі Мағзұм Мырзағалиев растады. Ол сертификат мерзімін ұзарту туралы өзіне бағытталған өтініштерді қарағанын айтты.

«Энергетика министрі міндетін атқарушының 2015 жылғы 4 желтоқсандағы №697 және инвестициялар және даму министрінің 2015 жылғы 23 желтоқсандағы №1219 бірлескен бұйрығымен бекітілген «Қазақстанда экологиялық таза автомобиль көлiк құралдарының және олардың компоненттерiнiң өндiрiсiн ынталандыру қағидаларына» сәйкес, жеңілдікті сертификат берілген күннен бастап тек 1 жылға ғана жарамды. Бұл ретте ТЖ әрекет еткен кезеңде автосалондардың жұмысы онлайн режимде жұмыс істеді. Осыны ескере отырып, жеңілдікті сертификаттың қолданыс мерзімін ұзарту мүмкін емес деп танылды», – деп жауап берді министр Мағзұм Мырзағалиев өз блогында.

Қу қағазға айналып жатқан осындай құжаты бар Александр Буйнов «Бипэк Автоның» (Азия Авто) сертификаттарды қабылдауды тоқтатқанына шағымданады.

«Оларға барсам, «Бипэк Авто» мамандары «ӨКМ операторы» сертификат төлемін аудару бойынша өз міндеттемелерін орындамайды, сол себепті оның сертификатын қабылдауды тоқтаттық дейді. Осының кесірінен жаңа автокөлік алу мүмкіндігінен айрылғалы тұрмын. Оның үстіне осы сертификатты алу үшін қомақты шығын шығардым. Шығындарымды енді кім өтейді?» – деп ашынады Александр.

Өз кезегінде «ӨКМ операторы» отандық-ресейлік автозауытты айыптап отыр.

«Біздің жеңілдікті сертификаттарды пайдалануды тоқтату туралы шешімді «Бипэк Авто Қазақстан» өз бетінше қабылдады. Олар бізді тиісті түрде құлақтандырған да жоқ. Жалпы, бекітілген қағидаларға сәйкес, сертификат иесі немесе оны қолдану құқығына ие болған басқа адам көлік сатушы автокәсіпорындарға өз бетінше жүгінеді», – деп жауап қатты оператор.

Компанияның түсіндіруінше, көлік сатушы кәсіпорын 1 сағаттан асырмай ол сертификаттың қабылданғанын автоматты ақпараттық жүйеге енгізуі керек. Яғни, оның нөмірін, берілген күнін және иесінің ЖСН/БСН-ын жазуы тиіс. Жүйе сертификаттың мәліметтерін автоматты түрде тексереді де оның бұрын пайдаланылмағаны расталса, басқа сатушылар ары қарай пайдаланбауы үшін бұғаттап тастайды. Осылайша, дұрыстығы расталып, бұғат қойылғаннан кейін көлік сатушы жеңілдікпен өткізілетін көліктің деректерін көрсетіп, анкета толтырады.

Одан кейін сатып алушыны тіркеу, оператормен хат алмасу, оның сұраған құжаттарын жолдау, өтінімнің тексерілуі, сертификатты пайдалануға «ӨКМ операторының» келісім беруі, одан кейін оны пайдалану туралы тиісті форма бойынша Акт толтыру, оған қол қою үшін сертификат иесін шақыру, актіні сканерлеп, жүйеге енгізу... Қысқасы, бюрократия батпағына батып кетуге болады. Әлгі пунктердің бірі дұрыс орындалмаса, оператор бас тарту жібереді.

Бірақ «ӨКМ операторы» қағидаларда белгіленген мерзімдерді және қаржыландыру шарттарын өзінің сақтап отырғанына сенімді. Компания Александр секілді адамдарға сертификатқа жалғыз «Бипэктің» ғана емес, «қазақстандық басқа да автоөндірушілердің автомобилін сатып алуға болатынын» еске салады.

Жанат Ардақ

120 мың ескі автокөлік утилизацияланды

Кәріз құдығының қақпағы автопластмассадан жасалады.  

11 Наурыз 2020 09:20 3603

120 мың ескі автокөлік утилизацияланды

Осыдан 3 жыл бұрын Қарағандының «Сарыарқа» арнайы экономикалық аймағында ескі автокөліктерді темірге айналдыратын зауыт ашылды. Кәсіпорынның құрылысына 3,4 млрд теңге жұмсалды.

Бүгінгі таңда зауыт міндетін мінсіз атқарып тұр. Бұған жыл басынан бері зауытта 7 мыңға жуық ескі көліктің өңделгені дәлел.

Кәсіпорынның қаржы директоры Иосифжан Сұранқұловтың сөзінше, зауыт 3 ауысыммен тәулік бойы тоқтаусыз жұмыс істейді. Мұнда 24 сағатта 150-200 автокөлік бөлшектеледі.

«Зауытта 107 адам жұмыс істейді. Олар соңғы 3 жылда 120 мың ескі техниканы  утилизациялады. Ескі көліктер арнайы құрылғылармен тығыздалып, металға айналдырылады. Қалдықтан алынған түсті қара металл қорытпасы аймақтағы мыс қорыту зауытына жөнелтіледі. Үкімет тозығы жеткен автокөлігін тапсырған тұлғалардың темір тұлпары жүріп тұрса - 150, ал істен шыққан болса - 48 мың теңгенің сертификатын ұсынады. Бағдарламаның алғашқы кезеңінде ескі автокөлігін тапсырған көлік жүргізушісі отандық автокөлік сатып алатын болса, онда оған 300 мың теңгенің сертификаты берілетін. Қазір қаржы сертификатының мөлшері 650 мың теңгеге жетті. Атап көрсетерлігі ескі автокөлігін өткізгендердің жартысынан көбі елімізде өндірілген автокөлікті тақымдауға тырысады. Ескі көліктерді қабылдау мен кәдеге жарату жобасы отандық автоөндірістің  әлеуетін арттырып тұр», – деді зауыттың қаржы директоры.

Оның сөзінше, ескі көліктерді қабылдау жобасы аясында еліміздің 17 қаласында тозығы жеткен темір тұлпарларға «тұсау» салынады.

«Автожүргізушілер сертификатты отандық көлік сатып алар кезде жеңілдік ретінде пайдаланады. Сертификатты 1 жыл ішінде қолдану керек. Ерекше атап көрсетерлігі, бір адамға жеңілдігі бар 2 сертификатты қатар қолдануға болады. Алайда сертификатты қайтаруға, ақшаға ауыстыруға болмайды», – деді Иосифжан Сұранқұлов.

Айтпақшы ескі көліктердің түрлі бөлшектері екінші рет кәдеге жаратылады екен.

Бұл туралы зауыттың өндіріс жөніндегі директоры Лұқман Мажеев: «Тозығы жеткен автокөліктерден алынған пластмассалар Алматыға жіберіледі. Онда кәріз құдықтарына қақпақ жасалады. Шиналарды Пришахтинскіге жөнелтеміз. Резиналар балқытылып, басқа мақсатқа қолданылады», – деді.

Жобаның алғашқы кезеңінде түрлі кедергілер болды. Соған тосқауыл қою үшін осыған дейінгі талап пен тәртіпке  өзгерістер мен толықтырулар енгізілді. Біріншіден, электронды кезек жүйесі іске қосылды. Оған «Өндірушілердің кеңейтілген міндеттемесі» операторының 8 800 080 08 65 телефон нөмірі я болмаса auto.recycle.kz сайты арқылы тіркелуге болады. Екіншіден, ӨКМ операторы ҚР ІІМ әкімшілік полиция комитетімен бірлесіп, көлік құралдарын жою мақсатында есептен шығару жөніндегі жалпыға ортақ анықтама құжатын бекітті. Үшіншіден, ӨКМ операторы энергетика министрлігімен және республикалық нотариалдық палатамен тізе қосып, ескі көлік құралын жоюға арналған сенімхаттың жалпыға ортақ үлгісін әзірледі. Төртіншіден, ӨКМ операторы Қазпошта арқылы заңды және жеке тұлғаларға шот ашу мәселесін шешті. Бесіншіден, делдалдар мен алыпсатарлардың жолы кесіліп, ескі автокөліктер көлік иелерінің өздерінен алынатын болды.

Абылай Бейбарыс

inbusiness.kz-ті қараңыз, оқыңыз :

Жаңалықтарға жазылу: