DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 311,62 Brent 36,55
Қазақстанның батысындағы хабтың қожайыны ресейліктер болады

Қазақстанның батысындағы хабтың қожайыны ресейліктер болады

Бүгін елордада құны 9 миллиард доллардай тұратын келісімшарттарға қол қойылды.

17 Мамыр 2019 15:20 5551

Қазақстанның батысындағы хабтың қожайыны ресейліктер болады

Автор:

Бақыт Көмекбайұлы

Астанада осымен үшінші жыл қатарынан жаһандық инвестициялар форумы – «Kazakhstan Global Investment Roundtable» өтті. Бұған дейінгі екеуіне Премьер болып тұрған тұста Бақытжан Сағынтаев басшылық етсе, бұл жолғы инвесторлар форумының хедлайнері Үкімет басшысы Асқар Мамин болып, бар назарын өзіне тартты.

Аспанмен бой таластырған Talan Towers заңғар ғимаратының алдында бүгін кілең қымбат көліктерден тұратын кептеліс пайда болды.Себебі осындағы The Ritz-Carlton Astana қонақүйінде ұйымдастырылған қалталылар басқосуына 41 елден 600-ден астам инвестор жиылыпты. Ірілері қатарында «Cisco», «Nokia», «CITIC Bank Corporation», «WILO SE Group», «AGCO Corporation», «Valmont Industries», «Tyson Foods», «Yildirim Group» және тағы басқа ірі компаниялардың топ-менеджерлерін айтуға болады.

Олар алдында сөз сөйлеген Үкімет басшысы тәуелсіздік жылдары Қазақстан экономикасына 300 млрд доллардан астам инвестициялар құйылғанын хабарлады. Ол өзінің жаңа лауазымға – омбудсмен болып бекітілгенін мәлімдеді. Бұған дейін ол қызметті инвестициялар және даму министрі атқарған.

«Бүгінде еліміз шетелдік инвесторлар үшін ауқымды мүмкіндіктерді ұсынады. Экономикамыз үшін инвестициялардың маңыздылығын түсіне отырып, біз шетелдік инвестицияларды тарту жөніндегі үйлестіру кеңесін құрдық. Инвестициялық омбудсменнің міндеттері қазір тікелей маған жүктеліп отыр. Әрине, бұл сіз бен бізге инвестициялық қызмет барысында туындайтын мәселелерді жылдам шешуге және инвесторлармен тиімді қарым-қатынас орнатуға мүмкіндік береді», – деді Асқар Мамин.

Іс-шара қорытындысында қатысушы инвесторлар отандық және шетелдік журналистер мен фотографтар алдында кезекпен-кезек арнайы үстелге отырып, жалпы құны 8,9 млрд АҚШ долларын құрайтын 45 коммерциялық келісімге қол қойып шықты.

Нақтырақ тоқталсақ, газ-химия саласында Маңғыстау облысының әкімдігі мен сингапурлық «Westgasoil» компаниясы метанол және олефиндерді өндіру бойынша жобаны жүзеге асыру жөнінде ынтымақтастық туралы келісім бекітті. Жобаның жүзеге асырылуы химия өнімдерінің өндірісін Маңғыстау өңірінде шоғырландыруды және тұтастай алғанда, елдің газ-химия кешенін дамыту арқылы импорт алмастыруды қамтамасыз етеді.

Экспортты дамыту мақсатында Жамбыл облысының әкімдігі мен түркиялық «Yıldirim Holding» Жамбыл өңірінде сода өндіру зауытын салу туралы келісімге келді. Зауыттың жылдық қуаттылығы 400 мың тоннаны құрайды.

Бұдан бөлек, ауыл шаруашылығы өнімдерін экспортауға бағытталған жылыжай кешендерін салу жобасы бойынша «Қазақ инвест» ұлттық компаниясы ресейлік инвесторы – «ЭКО-Культурамен» бірге тиісті келісімге қолтаңбаларын қалдырды.

Ал тамақ өнеркәсібінде Павлодар облысының әкімдігі мен қытайлық Beijing NAALE GROUP қант зауытын салу бойынша ынтымақтастыққа келді.

Бұдан өзге, дәл осы инвестор Алматы қаласының әкімдігімен келісімге келіп, Алматы қаласында алюминий өндіретін зауыт салуға ниет білдірді.

Көлік және логистика саласында түркиялық «YDA Holding» Түркістан облысының әкімдігімен бірге, осы өңірде халықаралық әуежай салу туралы келісімге қол қойды. Бұл – Қазақстан тарихындағы жаңадан бой көтеретін алғашқы әуежай болмақ. Астанадағы ЭКСПО үшін ашылған жаңа әуежай ескісінің жалғасы ретінде салынғаны мәлім. Ал «түркі жұртының бесігіндегі» жаңа халықаралық әуежай құрылысы «нөлден» басталады, яғни тақырдан тұрғызылады.

Көлік саласындағы тағы бір жобаны – Ақтөбе халықаралық әуежайы базасында логистикалық хабты құруды Ресей өз қолына алмақ. Бұл ретте, «Қазақ инвест» ұлттық компаниясы мен ресейлік «AEON» корпорациясы өзара меморандум жасасты.

Жатжұрттық бұл инвестор Ресейдің 14 өңірлік әуежайларында, соның ішінде Новосібір, Челябі, Волгоград, Томск, Астрахан, Чита, Түмен, Пермь, Мурманск, Кемерово, Минеральные Воды, Калининград, Улан-Удэ, Владикавказ секілді өңірлеріндегі әуежайлардың қожайыны болып табылады және олардың акцияларының бақылаушы пакетіне ие.

Оның еліміздегі жобасы енді Қазақстанның батысында қосымша авиациялық хабты құруға және «Еуропа-Азия» бағытындағы мультимодальды жүктер тасымалы үшін жаңа бағытты ашуға бағытталған. Жобаның Қазақстанға пайдасы – ол елімізді транзиттік дәліз ретінде нығайтуға мүмкіндік береді. Алайда хабтың қожайыны ресейліктер болмақ.

Тағы бір жаңалық, жақын арада астанада жаңа халықаралық мектептер желісі, колледж және білім беру кешені салынады. Осыған орай білім беру саласында еліміздің үш аймағы Нұр-Сұлтан, Алматы және Шымкент қалаларында сингапурлық инвестор Kinder World «Білім метрополисін салу – мектеп, колледж, университет» жобасының жол картасына қол қойды.

Бақыт Көмекбайұлы

inbusiness.kz-ті қараңыз, оқыңыз :

«Қазақстанда тай өнімдері қолданылатын SPA-салондарға сұраныс жоғары»

Былтыр Қазақстан мен Тайланд арасындағы тауар айналымы  91 млн АҚШ долларын құрады.

20 Мамыр 2019 16:01 1011

«Қазақстанда тай өнімдері қолданылатын SPA-салондарға сұраныс жоғары»

Қазақстан мен Тайландтың кәсіпкерлері елордада В2В кездесу өткізді. Басқосу барысында екіжақты сауда-экономикалық қарым-қатынастың тамырын тереңдету, іскерлік байланысты нығайту, Қазақстан экономикасына инвестиция тарту сынды мәселелер талқыланды.

Тай компаниялары логистикалық қызмет көрсетуге, құрылыс саласына қаржы құюға ниет танытты. Сондай-ақ олар Қазақстанға жеткізіп отырған косметика мен дәрумендердің көлемін ұлғайта алатындарын айтты.

Банкогтан келген кәсіпкерлер туризм тақырыбын да тілге тиек етті. Олар: «Көңілдеріңізге тисе де айтайық, сіздерде туризм тұралап тұр. Табиғаттарыңыздың кереметтерін шетелдік туристерге көрсете алмай отырсыздар. Шетелдік туристер Бурабай мен Шымбұлақтан басқа туристік аймақтырыңыздан хабарсыз. Бұл жерлерде қызмет көрсету құны қымбат, ал сапасы нашар. Туризм бұлай дамымайды. Біз сіздермен серіктесіп, Қазақстан туризмінің мүмкіндіктерін ашуға тәуекел етер едік. Бұл болашақтың еншісіндегі іс. Әзірше тауар айналымы бағытындағы жобаларды жүзеге асыруға болады. Жыл сайын Тайландқа Қазақстаннан көп турист келеді. Алдағы уақытта Қазақстанға Тайландтан турист келсе жақсы емес пе? Қазыналарыңыздың қаржысы еселеніп, туған жерлеріңіздің танымалдығы артады ғой», – деді.

Қазақстан сыртқы сауда палатасының мәлімдеуінше, В2В кездесу тәжірибе алмасу, инвестиция тарту, сауда-экономикалық байланыс аясын кеңейту алаңына айналады. Экономиканың түрлі салаларында алыс-беріс жасауға және Қазақстан мен Тайланд кәсіпкерлерінің мүмкіндігін арттыруға негіз болады.

Тайланд Королдігі елшілігінің қызметкері Семен Прошиннің мәлімдеуінше, былтыр Қазақстан мен Тайланд арасындағы тауар айналымы 91 млн АҚШ  долларын құрады.

«Бүгінгі кездесу тауар айналымынан былтыр түскен табыс көрсеткішін көбейтуді көздейді. Өздеріңіз білетіндей, Қазақстанда SPA-салондарға сұраныс жоғары. Бұл жерде көбінесе тай мамандары қызмет көрсетеді және мұнда Тайландта өндірілген өнімдер қолданылады», – деді Семен Прошин.

Қанат Махамбет

Қызанақтың жаңа түрлері өсіріледі

Екібастұзда қызанақ өсіретін жылыжай ауқымы кеңеймек.

20 Мамыр 2019 13:59 1362

Қызанақтың жаңа түрлері өсіріледі

2017 жылы «Greenhouse» ЖШС қарасты жалпы аумағы 5 гектар болатын «Qaztomat» жылыжайы іске қосылған болатын. Оның құрылысына 3,8 млрд теңге инвестиция құйылды. Былтыр бұл кәсіпорын 2,2 тонна қызанақ жинаса, биыл 2,7 тонна өнім алуды жоспарлап отыр. Тұқымды голландиялық «RijkZvaan» компаниясынан сатып алады. Аталмыш компанияның мамандары Екібастұзға арнайы келіп, көкөніс өсуінің барлық кезеңін назарда ұстайды. Сонымен қатар, жылыжайдағы температура, ылғалдылық және жарық «Priva» компьютерлік бағдарламасы арқылы бақыланады.

«Жылыжайдағы микроклимат табиғи жағдайларға өте ұқсас. Қызанақтарды өсіру үшін экологиялық әдістер қолданылады. Мысалы, тозаңдандыру кезінде аралар қолданылады. Өнімнің дәмі мен сапасы жақсы болғандықтан, сыртқы нарықтан сұраныс көп. Ресейдің «Лента» ірі сауда желісімен келісімшарт жасадық, соған сәйкес өнімнің 90 пайызы осы компанияға экспортталады», - деді «Greenhouse» ЖШС директоры Бауыржан Каменов.

Осы жылдың қыркүйек айында қызанақ өсіретін жылыжай аумағын кеңейтіп, 11,5 гектар жерді игеру жоспарланып отыр. Ал 2020 жылдың наурыз айында тағы 10 гектар жылыжай пайдалануға беріледі. Бауыржан Каменовтың айтуынша, қызанақтың қазіргі сұрыптарымен қатар, «Пауланка», «Плимола» деп аталатын түрлері егіледі. Бұл жобаның құны 61,5 млрд теңгені құрайды. Соның нәтижесінде 550 жаңа жұмыс орны құрылмақ.

Ақтоты Қабдықайыр, Павлодар облысы

inbusiness.kz-ті қараңыз, оқыңыз :

Жаңалықтарға жазылу: