/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 379,41 Brent 36,55
Интернет арналары кеңейтіліп, электронды қызметтер жетілдіріледі

Интернет арналары кеңейтіліп, электронды қызметтер жетілдіріледі

Вице-министрлер интернет пен электронды үкіметтің жұмыс істеу мәселесін қозғады.

11:09 07 Сәуір 2020 5338

Интернет арналары кеңейтіліп, электронды қызметтер жетілдіріледі

Автор:

Нұржан Көшкін

Еліміздің цифрлық даму, инновациялар және аэроғарыш өнеркәсібі вице-министрлері Дарын Тұяқов және Абылайхан Оспанов төтенше жағдай кезіндегі интернет желісінің тұрақтылығы мен электронды үкімет порталының жұмыс істеу мәселесі жайлы сөз қозғады.

Интернет арналарын кеңейту үшін 50 базалық станция салу жоспарланып отыр
Вице-министр Дарын Тұяқов карантин кезінде интернеттің әлсіреуіне не себеп болғанын айтып өтті.

«Бүгінгі төтенше жағдай кезінде байланыс қазметіне талап пен сұраныс күшейіп отыр. Бүкіл әлемде интернет арналарына зор салмақ түсуде. Елімізде де интернет абоненттерінің белсенді өсуі, интернет дүкендері арқылы тауарларды, тағам мен дәрі-дәрмектерді үйге жеткізуге тапсырыс берудің көбеюі, видеоконтентті қолданудың өсуі, үйден онлайн жұмыс істеуге көшу және оқушылар мен студенттердің қашықтықтан оқуы интернетке түскен салмақты арттыруда. Осы факторлар сыртқы интернет трафиктің 20%-дан асуына және ішкі арналардың жүктемесінің өсуіне әкеп соқты», – деп айтып өтті Дарын Тұяқов.

Вице-министр интернет арналарын кеңейту үшін тиісті жұмыстар жүргізіліп жатқанына ерекше тоқталды. Оның айтуынша, интернет желісінің тұрақты жұмысын қамтамасыз ету үшін жыл соңына дейін 50 базалық станция салу жоспарланған. 

«Сол себепті, өз тарапымыздан қолда бар мүмкіндіктерді пайдалана отырып, байланыс сапасын жақсартудамыз. Осы орайда байланыс операторлары интернет арналарын кеңейту үшін тиісті жұмыстар атқаруда. Сыртқы арналар 20%-ға кеңейтілді әрі байланыс сапасын бақылау үздіксіз жүргізілуде. Кейбір азаматтың радио толқынынан, таралатын сәуледен қорқуы себебінен Нұр-Сұлтан қаласында бірқатар тұрғын үйлерден базалық станция алынып тасталған болатын. Сол себепті кей жерде интернеттің нашарлығы байқалады. Осыған байланысты, қаланың интернет сапасы нашар жерлерінде қосымша базалық станция орнату мәселесі қала әкімшілігімен бірлесе отырып пысықталуда. Әкімшілік базалық станция орнату үшін электрмен жабдықталған жер телімін бөлуі керек. Станциялар тұрғын үйлерде орнатылмайды. Қазір қалада бес жерде антенна орнатылып, электрмен жабдықталды. Биыл елордада осындай 50 базалық станция салу жоспарда бар. Бұндай жұмыс Алматы қаласында басталып кетті. Сондай-ақ, осындай базалық станциялар басқа өңірлерде де салынады», – деді вице-министр.

Ал вице-министр Абылайхан Оспанов электронды үкімет порталы мен 1414 бірыңғай байланыс орталығының жұмысы жайлы айтып өтті. Оның сөзінше, 1414 бірыңғай байланыс орталығы бір күнде 600 мың қоңырау қабылдаған.

«Бүгінгі таңда барлық қызметтердің 80%-ын электронды түрде алуға болады. Биылғы жылдың соңына дейін электронды қызметтер үлесін 90%-ға дейін жеткіземіз. Мемлекеттік қызметтерді электронды түрде алушылардың саны жылдан жылға артуда. Төтенше жағдай кезінде халыққа қызмет көрсету орталықтары жабылды. Сол себепті, электронды түрде алуға болатынын қызметтерді халыққа жеткізу үшін 1414 бірыңғай байланыс орталығы жұмыс істеуде. Азаматтардың соққан қоңырауларына жауап беріу үшін 1414 бірыңғай байланыс орталығы қызметкерлерінің санын 2 жүзден 2 мыңға дейін жедел түрде арттырдық. Байланыс орталықтары әдетте ең көп дегенде күніне 25-30 мың қоңырау қабылдаса, қазір 600 мыңға дейін қоңырау соғылатын кездер болады» – деді вице-министр. 

Сондай-ақ Абылайхан Оспанов автосалондарда сатылып алынатын жаңа көліктерді электронды түрде тіркеу іске қосылатынын айтып өтті.

«Ұлттық ақпараттық технологиялар» акционерлік қоғамымен, сондай-ақ мемлекеттік органдармен бірлесе отырып бірқатар мемлекеттік қызметті электронды форматқа көшіру және қолданыстағы қызметтерді жетілдіру жөнінде жұмыстар атқарып жатырмыз. Мысалы, жақында ең көп пайдаланылатын қызметтердің бірі – жаңа автокөлікті онлайн режимде тіркеуді жүзеге асыруды жоспарлап отырмыз. Бұл қызмет автосалондарда сатылып алынатын көліктерді тіркеу кезінде пайдаланылады. Бұрын тіркелген автокөлігіңізді басқа адамға сатқыңыз келсе, электронды форматта іске асыру мүмкін екенін білесіз», – деді вице-министр.

Халыққа қызмет көрсету орталықтары жабылса да, ЭЦҚ алуға болады
Әр түрлі электронды қызметтерді алу үшін электрондық цифрлық қолтаңба (ЭЦҚ) қажет екені белгілі. Төтенше жағдайға байланысты халыққа қызмет көрсету орталықтары жабылды. Дегенмен, бүгінгі күні электронды түрде ЭЦҚ алудың бірнеше тәсілі бар. 

Вице-министр Абылайхан Оспанов электронды цифрлық қолтаңбаны электронды үкімет порталында еш кедергісіз алу үшін бірнеше тетік қарастырылғанын айтып өтті.

«Халыққа қызмет көрсету орталықтары (ХҚКО) жабылса да, ЭЦҚ алу мәселесін шештік. Бүгінгі күні бет жүзіңізді биометрикалық сәйкестендіру және бір реттік құпиясөзді қолдану арқылы электронды түрде ЭЦҚ алуға болады. Бұл тетік қазіргі кезде жұмыс істеп тұр. Осы жолмен заңды тұлғалар да ЭЦҚ ала алады. Электронды түрде қызмет алудың екінші тетігі – бір жолғы құпиясөз арқылы сұрауларды мақұлдау. Осы тәсілмен қызмет алу үшін сіздің мобильді телефоныңыздың нөмірі азаматтарға арналған электронды үкіметтің базасында болуға тиіс. Яғни базаға тіркелу керек. Қазір базамызда 8 млн нөмір бар. Сондай-ақ Халыққа қызмет көрсету орталығына бармай қызмет алудың тағы бір тетігін іске қостық. Ол – осы орталыққа жүгіну. Ол үшін 800 ХҚКО операторы жұмыс істеуде», – деді Абылайхан Оспанов.

Нұржан Көшкін

 

125 млн теңгенің келісімшарты бұзылды

Полицейлер Л-1 қорғаныш костюмдерін сатып алудан бас тартты.

13 Мамыр 2020 10:43 489

125 млн теңгенің келісімшарты бұзылды

Қызметкерлерін коронавирустан қорғайтын киіммен қамтамасыз еткісі келген Алматы қаласы полиция департаментінің басына бұлт үйірілді.

Мұндағылар satu. kz сайтында 12 - 60 мың теңге аралығында саудаланған Л-1 қорғаныш костюмдерінің бір жиынтығын 250 мың теңгеден сатып алмақ болған. Полицейлер 500 киім жиынтығына тапсырыс беріп, көрсетілген қызметке 125 млн теңге төлеуге келіскен.

Кім білсін, әлеуметтік желіде «бұл не деген батпан құйрық» деп дабыл қағылмағанда, полиция қызметкерлері «шыттай» киініп жүрер ме еді?

Абырой болғанда, алыс-беріс жасалған жоқ. Бірақ қоғам дүрлігіп, шу шықты.

Бұл туралы Ұлттық қоғамдық сенім кеңесінің бұрынғы мүшесі, кәсіпкер Арман Шораев instagram парақшасына: «Алматы қаласының полиция департаменті, баспасөз қызметі, Салтанат Әзірбек, сіздер осыдан 3 апта бұрын қоғамға менің қамауға алынғанымды ерекше ықыласпен жеткізіп едіңіздер. Енді, сондай рахатпен халыққа сатып алудың мән-жайын түсіндірулеріңізді сұраймын», – деп жазды. Ал protenge.kz : «Жалпы құны 125 млн теңгені құрайтын келісім жасалған.Тапсырысты орындайтын компания әлі күнге дейін мемлекеттік сатып алуға қатыспаған. Ал satu.kz -те мұндай костюмдер 12-60 аралығында сатылып жатыр»,– деп мәлімдеді.

Осының ізінше Алматы қаласы полиция департаменті БАҚ өкілдеріне түсінік беріп, хабарлама таратты.

«Наурыз айында төтенше жағдай режимі жарияланған соң полицейлерге қорғаныш заттарын алу керек болды. Бірнеше компанияның ұсынысы мен  мен бағасы салыстырылып, 4 мамырда ең төменгі баға ұсынған компаниямен келісімшарт жасалды. Құжатта тауар сипаттамасына және бағасына сай болмаған жағдайда полиция департаментінің келісімшартты бұзу құқы бар екені туралы бөлек тармақ бар», – деп жазды Алматы қаласының полиция департаменті.

Белгілі болғандай, 6 мамырда полиция департаментіне Л-1 қорғаныш костюмдері жеткізілген. Алайда оның сапасы сын көтермеген.

«Жеке қорғаныс киімдері коронавирус инфекциясынан қайтыс болған адамдарды, сондай-ақ инфекция ошақтары табылған жерлерді тексеретін жедел-тергеу топтарына арналған. Алматы қаласының полиция департаменті тауардың сапасы бағасына сай емес екенін көріп, жазбаша түрде келісімшартты бұзатынын көрсетті», – деді полиция департаментінің өкілдері.

Кеше, 11 мамыр күні келісімшарт күшін жойды.

Біле жүріңіз, төтенше жағдай кезінде Алматы қаласының 5 мыңнан астам полиция қызметкері карантиннің сақталуын қамтамасыз етті.

Абылай Бейбарыс

Шымкентте тағы да шу: Запастағы сарбаздар әкімдікке барды

Төтенше жағдай кезінде арнаулы әскери жиынға қабылданғандар жалақы мәселесін көтерді. 

13 Мамыр 2020 10:37 500

Шымкентте тағы да шу: Запастағы сарбаздар әкімдікке барды

Бейбіт күнде әскерилер сапына қосылған  запастағы сарбаздар төтенше жағдай кезінде қаладағы залалсыздандыру жұмыстарын атқарған. ТЖ режимі аяқталған соң, жиыннан босатылған олар билік уәдесінде тұрмады деп отыр. О баста ас-ауқаттан бөлек жалақысыз қаламыз ба деп алаңдаған олар қалалық әкімдік ғимаратына жиналды.

Шымкенттік Жақсылық Жолтыханов өзге де жерлестерімен бірге бір айға жуық қалада дезинфекциялық жұмыстарды атқарған. Алайда қолдарына берілген келісімшарт жарамсыз деп есептейді. Берілген күні, мөрі мен жалақы мөлшері көрсетілмеген. Енді запастағы сарбаздар бір ай бойы маңдай теріміздің ақысын ала алмай қаламыз ба деп қорқады. Бұдан өзге  дезинфекциялық шараларды атқарған олар тиісті ас-ауқатты да көрмедік дейді.

«Бір айға жуық уақыт бойы бәріміз дезинфекциялық жұмыстарды атқардық. Хлордың денсаулыққа қандай зиян екені белгілі. Бірақ, өтемақы берілмеді. Жай көзбояушылық болып тұр. Осылайша алданып отырмыз. Жалақы алмадық. Бізге о баста жұмыс орны сақталып, әскери қызметкер мәртебесі беріледі делінген. Ол да жоқ»,-деді тұрғын.

Әкімдік ғимараты алдына шыққан қала әкімі Мұрат Әйтенов наразылық танытушылардың   мәселесін мұқият тыңдап, еткен еңбек ақысы өтелетінін жеткізді.

«Негізі сіздерге берілетін қаржы бөлініп қойған. Барлығыңызға таратып береміз. Орындаушылар мына келісімшартты қалай жасағанын білмеймін, бәрін тексеремін. Мен де сіздер секілді әскери адаммын. Кінәлілер жазасын алады, жалақы төлеу мәселесі шешіледі»,-деді әкім.

Еске салсақ, сәуірдің 2-сі күні ел президенті Қасым-Жомарт Тоқаев «Әскери міндеттілерді арнайы жиынға шақыру» туралы Жарлыққа қол қойды. Онда запастағы сарбаздар төтенше жағдай кезінде арнаулы әскери жиынға қабылданатыны жазылған. Сәуірдің 14-і күні Шымкентте 100-ге жуық тұрғынның арнаулы әскери жиынға қабылданғаны белгілі болды.

Қорғаныс министрі Нұрлан Ермекбаев арнаулы жиын кезінде әскери міндетті адамдар әскери қызметкер мәртебесіне және заңға сәйкес әлеуметтік сипаттағы жеңілдіктердің бәріне ие болатынын мәлімдеген болатын. Яғни, олар тамақпен, заттай, медициналық көмекпен қамтылады. Бұдан өзге  арнаулы жиын кезінде олардың жұмыс орны, лауазымы сақталады. Егер сарбаз бұған дейін жұмыс істеп келген болса, онда оған мемлекет есебінен жұмыс орнындағы айлығы төленеді. Ал жұмыс істемейтін азаматтарға ең төменгі айлық мөлшері (42 500 теңге) берілетінен уәде еткен еді.

Жансая Тәуекелқызы