/img/tv1.svg
RU KZ
DOW J 23 724,20 Hang Seng 24 275,22
FTSE 100 5 842,66 KASE 2 249,72
РТС 1 143,71 Өнеркәсібі 1 484,00
Коронавирус құрсауындағы үшінші күн: Мәскеу мен Миланға Сеул қосылды

Коронавирус құрсауындағы үшінші күн: Мәскеу мен Миланға Сеул қосылды

9 науқас және визасыз режим.

15 Наурыз 2020 21:49 1342

Коронавирус құрсауындағы үшінші күн: Мәскеу мен Миланға Сеул қосылды

Автор:

Есімжан Нақтыбайұлы

Елімізде коронавирустың алғашқы дерегі тіркелгеніне үш күн болғанда Президент Қасым-Жомарт Тоқаевтың Жарлығымен 16 наурыз бен 15 сәуір аралығында республика бойынша төтенше жағдай енгізілді. Оған Алматы қаласында індет жұқтырғандардың саны 5-тен асуы себеп болған.

Түс ауа Денсаулық сақтау министрі Елжан Біртанов «Хабар-24» телеарнасы арқылы тікелей эфирге шығып, коронавирус жұқтырған тағы екі адамның тіркелгенін хабарлады. Оның бірі емдеуде жатқан жұбайынан ауру жұқтырса, екіншісі коронавирусты Кореяда жұқтырғаны белгілі болды.

Бүгінгі таңда провизорлық карантин мен үйде оқшаулауға алынған адамдар саны 2000-ға жуықтады

Төтенше жағдай жариялануы жұрт ішінде түрлі сұрақ туғызып жатты. Әсіресе сауда орындарының жұмысына шектеу қойылатыны азық-түлік алып, қамданып үлгермеген халықты алаңдатып тастаған. Көп кешікпей Сауда және интеграция министрлігі төтенше жағдай кезінде азық-түлік маркеттері жабылмайтынын мәлімдеді. 

Сонымен, төтенше жағдай кезеңінде өміріміз қалай өзгереді?

Күзет күшейтіледі

Аса маңызды мемлекеттік және стратегиялық, ерекше режимдік, режимдік және  ерекше қорғалатын онысандардың,  халықтың тыныс-тіршілігін және көлік қызметінің жұмыс істеуін қамтамасыз ететін нысандардың күзетілуі күшейтіледі.

Сауда, ойын-сауық орталықтары жұмыс істемейді

Ірі сауда нысандарының жұмыс істеуіне шектеу қойылды. Яғни, сауда ойын-сауық орталықтарының, кинотеатрлардың, театрлардың, көрмелердің және адамдар көп жиналатын басқа да объектілердің қызметі тоқтатылды.

Карантин енгізілді

Ел аумағында карантин енгізілуіне байланысты Қорғаныс министрлігі мен ішкі істер органдарының қатысуымен санитариялық-эпидемиологияға қарсы ауқымды шаралар ұйымдастырылады.

Той-томалақ, науқан өткізуге жол жоқ

Президенттің Жарлығында бұл турасында: «Ойын-сауық,  спорттық  және басқа да бұқаралық іс-шараларды, сондай-ақ  отбасылық,  салт-дәстүр іс-шараларын өткізуге тыйым салынсын», – делінген.

Елге кіру және шығу шектелді

Дипломатиялық қызмет персоналын, ҚР Сыртқы істер министрлігінің шақыруымен келетін халықаралық ұйымдар делегацияларының мүшелерін қоспағанда, Қазақстан Республикасының аумағына көліктің барлық түрлерімен кіруге, сондай-ақ оның аумағынан шығуға шектеулер белгіленді.

Сақтық шараларына министрлер мен облыс әкімдері жауапты

Төтенше жағдай режимі кезінде қолданылатын шаралардың іске асырылуына Президент жанындағы Төтенше жағдай режимін қамтамасыз ету жөніндегі мемлекеттік комиссия құрамына енген  ІІМ, ҰҚК, Қорғаныс министрлігі, ДСМ, ИИМ, Қаржы министрлігі, Нұр-Сұлтан, Алматы, Шымкент қалаларының және облыстардың әкімдері жауапты болып айқындалды.

Барлық шара мен шектеулер Бас Прокурордың бақылауында болады.

Үкімет резервінен қажетті қаражат бөлінеді.

Режимді сақтаудан бас тартқан адамдарды не күтеді?

«Медициналық тексеруден және емделуден, карантиндік режимді сақтаудан бас тартатын, эпидемиологиялық жағдайды айқындау үшін маңызы бар деректерді жасыратын адамдарға бақылау, сондай-ақ аталған адамдардың жауаптылығының шаралары күшейтілсін», – деп жазылған Жарлықта

Ертең Президент Қасым-Жомарт Тоқаев елдегі жағдайға байланысты көгілдір экран арқылы ел алдына шығып, үндеу жасайтыны белгілі болды. 

Қытай туристеріне берілген жеңілдік жойылды

Корнавирус Қазақстан билігіне кейбір елдермен туристік қатынасты абайлап жасауға мәжбүрлеп отыр. Мысалы, Қытай азаматтарына берілген 72 сағаттық визасыз режимнің күші жойылды. Ол тек 1 шілдеде қайта жандануы мүмкін. Үндістанда да індеттің ірге жаюы екі арадағы визасыз келісімді уақытша тоқтатты. 

Кешке қарай елімізде коронавирус жұқтырғандар саны 9-ға жетті. Германиядан келген атышулы ұшақта болған 12 жастағы қыз бала қазір Алматыда емделуде. Осылайша Алматы қаласында 7 науқас, елордада 2 науқас дәрігерлердің бақылауында ем алып жатыр.

Есімжан Нақтыбайұлы

inbusiness.kz-ті қараңыз, оқыңыз :

Коронавирус: әлем бойынша 25 наурыздағы соңғы жаңалықтар

Қырғызстан астанасы Бішкек қаласында бүгіннен бастап коменданттық сағат енгізіледі. Польша депутаттары 27 наурыздан бастап қашықтықтан жұмыс істеуге көшеді. Соңғы мәлімет бойынша, барлық елдердегі вирус жұқтырғандардың саны 400 мыңнан асып кеткен. 

25 Наурыз 2020 13:37 1282

Коронавирус: әлем бойынша 25 наурыздағы соңғы жаңалықтар

Қаза тапқандар мен жұқтырғандар 

Қытайдың мемлекеттік CGTN телеарнасының соңғы мәліметіне сүйенсек, осы күнге дейін вирусты 81846 қытайлық жұқтырған. Оның 3287-сі қаза тапқан (төртеуі Гонконгта, екеуі Тайваньда). 73650 кісі аурудан айыққан. Басқа елдерде вирус жұқтырғандардың саны 320 мыңнан асқан. Вирус әлемнің 160-тан астам еліне таралып кеткен. 

Қазақстандағы жағдай

Елімізде 79 адамның коронавирус жұқтырғаны ресми түрде тіркелді. Науқастардың 31-і Алматыда, 41-і Нұр-Сұлтанда, 2-еуі Қарағандыда, 1-еуі Алматы облысында, тағы 1-еуі Ақтөбе облысында, 1-еуі Шымкентте, 1-еуі Солтүстік Қазақстан облысында, 1-еуі Жамбыл облысында. 16 наурыздан бастап Қазақстанда төтенше жағдай режимі жарияланды. Ол 15 сәуірге дейін жалғасады. Ал 19 наурыздан бастап осы екі қала карантинге жабылды.

Басқа елдердегі жағдай

АҚШ-тағы Гарвард университетінің президенті Лоуренс Бэкоу мен оның жұбайы ауруға шалдыққанын мәлім етті. Бұған дейін президент Дональд Трамптың жұбайы Мелания Трампқа коронавирусты анықтайтын сараптама жасалып, оның сау екені анықталған болатын. Вашингтон губернаторы Джей Инсли Covid-19 инфекциясының таралуын тежеу мақсатында тұрғындарға екі аптадай үйден шықпауға кеңес берді. Жалпы, елдегі науқастардың саны 53000-нан, қаза тапқандардыкі 703-тен асты. Осы орайда Құрама Штаттар бірқатар елдің азаматтарына виза беруді уақытша тоқтатып тастады. 

Ресейде вирус жұқтырғандардың саны 495-ке жетіп,бір адам қайтыс болды. 22 кісі аурудан айыққан. 93 мың тұрғын қазір дәрігерлердің бақылауында. Ресми дерек бойынша, науқастар індет өршіп тұрған елдерден келген. Олар ауруханадағы арнайы бокстарға жатқызылды. Ресейлік депутат Василий Власов карантин уақытында тұрғындарды коммуналдық төлемдерден босатуды ұсынды. Тиісті құжатты елдің құрылыс министрі Владимир Якушев қарастырып, жақын күндері шешімін айтады.

Еске сала кетсек, 19 наурызда ресейлік ғалымдар коронавирус геномын анықтаған. Медицина ғылымдарының докторы Дмитрий Лиозновтың айтуынша, генетикалық сараптама вирус эволюциясын болжауға және вакцина жасауға зор септігін тигібек. Бұл мәлімет Дүниежүзілік денсаулық сақтау ұйымы мен жаһандық зерттеу топтарының деректер базасына жіберіледі. Жергілікті билік 18 наурыз бен 1 мамыр аралығында шетелдіктердің елге келуіне шектеу қойды.

Қырғызстан астанасы Бішкек қаласында 25 наурыздан бастап коменданттық сағат енгізілді. Ал бұған дейін бірқатар ауданда төтенше жағдай режимі жарияланды. Нақтырақ айтқанда, мұндай режим 25 наурызда Ош, Джалал-Абад қалаларында, Ош облысының Ноокат, Қара-Сүй аудандарында және Созақ аудандарында енгізілді. Елдегі науқастардың саны 42-ге жеткен. Басым бөлігі Сауд Арабиясы мен Кувейттен келген екен. Қазір олар тиісті ем қабылдап жатыр. 19 наурыздан бастап жергілікті билік шетелдіктердің елге кіруіне тыйым салды. 

Оңтүстік Кореяда ауруға шалдыққандардың саны 9100-ден асқан, оның 3700-ден астамы жазылды. 126 кісі қаза тапқан. Бұл ел эпидемиологиялық қауіптің ең жоғарғы деңгейін жариялады. Әсіресе Тэгу қаласы мен Кенсан-Пукто провинциясының үш қаласы апат аймағы деп жарияланды. Мектептердің жұмысы тағы да 6 сәуірге дейін шегерілді. Жергілікті билік алдағы 15 күнде тұрғындарды үйден шықпауға шақырды. Ресми деректерге сүйенсек, Оңтүстік Кореяда осы күнге дейін коронавирусты анықтайтын 300 мыңдай тест жүргізіліпті. 

Италияда науқастардың саны 69176-дан асты, оның 6820-сы қаза тапқан. Жергілікті биліктің дерегі бойынша, вирустан қаза табу фактілері күрт көбейе түскен. 30 мың науқас Ломбардияда тіркелген, мұндағы ауруханаларда орын тапшы. Сарапшылардың айтуынша, Италиядағы халықтың 23 пайызы - жасы 65-тен асқандар. Коронавирус кесірінен қайтыс болғандардың осы елде басқа еуропалық елдерге қарағанда көп болуы осыған байланысты деген пікірде мамандар. Ал кейбіреулерінің сөзінше, бұған вирусты анықтайтын сараптамалардың дұрыс жүргізілмеуі себеп болып отыр.

Иранда аурулардың саны 25 мыңға жетіп,оның шамамен 2000-ы ажал құшты. 8913 кісі ем-дом қабылдап жазылды. 

Түркияда вирусты жұқтырғандардың саны 1872-ге жетіп, 44 адам қайтыс болған. 18 наурызда ел президенті Реджеп Тайып ердоған коронавирус салдарымен күреске 15,5 млрд доллар бөлген болатын. 

Польшада науқастардың саны 774-ке жетіп, 9 адам қайтыс болды. Жергілікті билік шекараны жауып, елге келушілерді 14 күндік карантинге жатқызып жатыр. 27 наурыздан бастап парламент депутаттары қашықтықтан жұмыс істеуге көшеді. Нақтырақ айтқанда, отырысқа тек санаулы заң шығарушы қатысса, қалғандары қашықтықтан бақылайтын болады.

Коменданттық сағат енгізген елдер: Албания, Германия (Миттертайх қаласы), Грекия, Сербия, Францияның бірқатар қалалары, Сенегал, ОАР, Эквадордың бірқатар провинцияларында, Египет, Иордания, Ирак, Кувейт,Мавритания, Палестина, Сауд Арабиясы, Тунис, Шри-Ланка. 

Еске сала кетсек, дейін қытайлық ғалымдар «Фавилавир» деп аталатын препаратқа клиникалық зерттеу жүрзізуді аяқтады. Бұл – коронавирус жұқтырғандардың қызуын басатын дәрі. Елдегі «Жэньминь жибао» басылымының дерегіне сүйенсек,  препаратты қытайлық Zhejiang Hisun Pharmaceutical компаниясы жасайды екен. Зерттеушілер оның науқастарға тигізер зияны жоқ екенін анықтады.  

Ал 17 наурызда АҚШ-тың Kaiser Permanente Washington Research институтында  коронавирусқа қарсы вакцина сынақтан өткізіле бастады. Бір ай бойы ғалымдар 45 еріктіге препаратты екі мәрте егіп, олардың денсаулығын бақылайтын болады. Ал Жапонияда Covid-19 инфекциясын жұқтырғандарды «Авиган» деп аталатын дәрімен емдей бастауы мүмкін.

11 наурызда Дүниежүзілік денсаулық сақтау ұйымы жаңа коронавирус індетін пандемия деп таныған болатын. Қазір ұйым ауру симптомдары жасырын адамдардан вирустың қалай жұққанын зерттеп жатыр. 

Табиғат Нұрболат

Коронавирус: әлем бойынша 21 наурыздағы соңғы жаңалықтар

АҚШ-тың вице-президенті Майкл Пенстің қызметкері ауруға шалдыққаны анықталды. Ресми мәліметке сүйенсек, науқас Дональд Трамппен де, Майкл Пенспен де тікелей қарым-қатынаста болмаған. Covid-19 пандемиясына байланысты Гондураста коменданттық сағат жарияланды.

21 Наурыз 2020 12:35 1222

Коронавирус: әлем бойынша 21 наурыздағы соңғы жаңалықтар

Фото: Максим Морозов

Қаза тапқандар мен жұқтырғандар 

Қытайдың мемлекеттік CGTN телеарнасының соңғы мәліметіне сүйенсек, осы күнге дейін вирусты 81416 қытайлық жұқтырған. Оның 3261-і қаза тапқан (төртеуі Гонконгте, екеуі Тайваньда). 71876 кісі аурудан айыққан. Басқа елдерде вирус жұқтырғандардың саны 16400-ға жеткен. Оның 8000-нан астамы ажал құшқан құшты. Вирус әлемнің 160-тан астам еліне таралып кеткен. 

Қазақстандағы жағдай

Елімізде 53 адамның коронавирус жұқтырғаны ресми түрде тіркелді. Науқастардың 22-сі – Алматыда, Алматы облысында – 1 адам, 28-і –Нұр-Сұлтанда, 2-еуі – Қарағандыда.

16 наурыздан бастап Қазақстанда төтенше жағдай режимі жарияланды. Ол 15 сәуірге дейін жалғасады. Ал 19 наурыздан бастап осы екі қала карантинге жабылды.

Басқа елдердегі жағдай

Құрама Штаттардың вице-президенті Майкл Пенстің қызметкері ауруға шалдыққаны жарияланды. Ресми мәліметке сүйенсек, науқас Дональд Трамппен де, Майкл Пенспен де тікелей қарым-қатынаста болмаған. Еуропадағы 35 америкалық сарбаздан вирус анықталды. Нью-Йорктегі науқастардың саны 5000-нан асқан.Жалпы, елдегі науқастардың саны 18000-нан, қаза тапқандардыкі 220-дан асты. Осы орайда Құрама Штаттар бірқатар елдің азаматтарына виза беруді уақытша тоқтатып тастады. 

Ресейде вирус жұқтырғандардың саны 253-ге жетіп,бір адам қайтыс болды. Ресми дерек бойынша, науқастар індет өршіп тұрған елдерден келген. Олар ауруханадағы арнайы бокстарға жатқызылды.

19 наурызда ресейлік ғалымдар коронавирус геномын анықтады. Медицина ғылымдарының докторы Дмитрий Лиозновтың айтуынша, генетикалық сараптама вирус эволюциясын болжауға және вакцина жасауға зор септігін тигібек. Бұл мәлімет Дүниежүзілік денсаулық сақтау ұйымы мен жаһандық зерттеу топтарының деректер базасына жіберіледі. Жергілікті билік 18 наурыз бен 1 мамыр аралығында шетелдіктердің елге келуіне шектеу қойды.

Қырғызстанда тағы 6 кісі ауруға шалдығып, науқастардың саны 12-ге жетті. Бұл туралы елдің Денсаулық сақтау министрлігі хабарлады. Қазір олардың барлығы тиісті ем қабылдап жатыр. 19 наурыздан бастап жергілікті билік шетелдіктердің елге кіруіне тыйым салды. 

Оңтүстік Кореяда ауруға шалдыққандардың саны 8700-ден асқан, оның 2600-дан астамы жазылды. 102 кісі қаза тапқан. 

Италияда науқастардың саны 47000-нан асты, оның 4032-сі қаза тапқан.

Осы аптада жергілікті ғалымдар ауруға қарсы вакцинаны сынақтан өткізеді. Егер де сынақ сәтті өтсе, күзде препаратты адамдарға еге бастайды. Ел шекарасы 14 күнге жабылды. Қытайлық дәрігерлер Италия билігінің індетпен күресте жүргізіп жатқан шараларын жеткіліксіз деп отыр. Сарапшылардың айтуынша, Италиядағы халықтың 23 пайызы – жасы 65-тен асқандар. Коронавирус кесірінен қайтыс болғандардың осы елде басқа еуропалық елдерге қарағанда көп болуы осыған байланысты деп отыр мамандар.

Иранда аурулардың саны 19600-ден асып,оның 1433-і ажал құшты. 6745 кісі ем-дом қабылдап жазылды. 

Испанияда вирусты жұқтырғандардың саны 19980-ге жетті, шамамен 1000 адам қайтыс болған. 

Гондурас билігі 29 наурызға дейін елде коменданттық сағат жариялады. Тек азық-түлік сататын дүкендер, дәріханалар, азық-түлік және дәрі өндіретін кәсіпорындар жұмыс істейтін болды. Бұл елде вирус жұқтырғандардың саны 24-ке жеткен.

Бұған дейін қытайлық ғалымдар «Фавилавир» деп аталатын препаратқа клиникалық зерттеу жүрзізуді аяқтады. Бұл – коронавирус жұқтырғандардың қызуын басатын дәрі. Елдегі «Жэньминь жибао» басылымының дерегіне сүйенсек,  препаратты қытайлық Zhejiang Hisun Pharmaceutical компаниясы жасайды екен. Зерттеушілер оның науқастарға тигізер зияны жоқ екенін анықтады.  

Ал 17 наурызда АҚШ-тың Kaiser Permanente Washington Research институтында  коронавирусқа қарсы вакцина сынақтан өткізіле бастады. Бір ай бойы ғалымдар 45 еріктіге препаратты екі мәрте егіп, олардың денсаулығын бақылайтын болады. Ал Жапонияда Covid-19 инфекциясын жұқтырғандарды «Авиган» деп аталатын дәрімен емдей бастауы мүмкін.

Еске сала кетсек, 11 наурызда Дүниежүзілік денсаулық сақтау ұйымы жаңа коронавирус індетін пандемия деп таныған болатын. Қазір ұйым ауру симптомдары жасырын адамдардан вирустың қалай жұққанын зерттеп жатыр. 

Табиғат Нұрболат

inbusiness.kz-ті қараңыз, оқыңыз :

Жаңалықтарға жазылу: